پیپلز پارٹی کے رکنِ قومی اسمبلی نبیل گبول نے کہا ہے کہ غیرقانونی تعمیرات کیخلاف سخت آپریشن شروع کیا جائے گا،120 مخدوش عمارتوں کوخالی کرایا جارہا ہے۔
انہوں نے لیاری کے علاقے بغدادی میں زمین بوس ہونے والی عمارت کا دورہ کیا،اس موقع پر ان کا کہنا تھا کہ متاثرہ عمارت بنانے والے بلڈر کے خلاف صرف مقدمہ ہی نہیں بلکہ اسے گرفتار بھی کرائیں گے۔
انہوں نے کہا کہ لوگوں کو گھرو ں سے نکالنے کے لیے بڑے آپریشن کی ضرورت ہے،متاثرین کو کوئی دوسری جگہ دیں گے،معاوضہ بھی ملے گا۔
ان کا کہنا تھا کہ جب تک عوام ساتھ نہ دیں اس طرح لوگوں کو زبردستی نہیں نکال سکتے،غیرقانونی تعمیرات کی اجازت دینے پرافسران کو نوٹسز نہیں بلکہ کارروائی کی جائے۔
انہوں نے واضح کیا کہ عوام غیر قانونی تعمیرات میں خرید وفروخت نہ کریں۔
