اسلام آباد: فنانس ایکٹ 2025 کے نفاذ کے ساتھ ہی درآمدی دودھ، دہی، پنیر، پھلوں سمیت 100 سے زائد اشیا پر ڈیوٹی ٹیکس میں کمی کر دی گئی۔ اس حوالے سے فیڈرل بورڈ آف ریونیو (ایف بی آر) نے باضابطہ طور پر نوٹیفکیشن جاری کر دیا۔
رپورٹ کے مطابق ایف بی آر کے جاری کردہ نوٹیفکیشن کا اطلاق یکم جولائی سے کر دیا گیا۔ اس کے مطابق پنیر اور دہی کی درآمد پر ڈیوٹی کم کردی گئی ہے جبکہ موبائل فون سم کارڈز پر ریگولیٹری ڈیوٹی 15سے کم کر کے 12 فیصد کر دی گئی۔ اسی طرح نئی کاروں اور منی وینز پر ڈیوٹی ایک تہائی سے 10 فیصد تک کم کر دی گئی۔
نوٹیفکیشن کے مطابق درآمد شدہ ایس یو ویز پر 44 فیصد کمی سے ڈیوٹی 50 فیصد ہو گئی۔ مرغی، مچھلیوں پر ریگولیٹری ڈیوٹی 5 فیصد کردی گئی جبکہ پرندوں کے انڈوں پر ڈیوٹی 15فیصد سے کم کر کے 10 فیصد کردی گئی۔
کتے اور بلی کے کھانے پر 5 فیصد کمی سے ڈیوٹی کی شرح 40 فیصد کردی گئی۔ جبکہ ریٹیل پیک میں انسٹنٹ کافی پر ڈیوٹی میں 5 فیصد کمی کردی گئی ہے۔
یہ بھی پڑھیں: بجلی کے بنیادی ٹیرف میں ایک روپے ، 14 پیسے کی کمی ، لائف لائن صارفین کو ریلیف نہیں ملے گا
اس کے علاوہ تمباکو پر ڈیوٹی 40 فیصد تک کم کردی گئی، کھجور، ناریل، برازیلی گری دار میوے، کاجو پر ڈیوٹی 16 فیصد تک کم کی گئی۔ انجیر، انناس، ایوکاڈو، امرود اور آم پر ڈیوٹی میں 20 فیصد کمی کی گئی۔ جبکہ پپیتا اور سیب پر ڈیوٹی 45 فیصد سے کم کر کے 36 فیصد کر دی گئی۔
نوٹیفکیشن کے مطابق گری دار میوے پر ریگولیٹری ڈیوٹی میں 4 فیصد کمی کی گئی ہے، فروزن مچھلی پر ڈیوٹی نصف کر کے 17.5 فیصد کر دی گئی ہے۔
