اسلام آباد: سولر پینلز کی بے تحاشا انسٹالیشن کے باعث حکومت نے نیٹ میٹرنگ نرخ گرانے کی تیاری کر لی۔
رپورٹ کے مطابق نیٹ میٹرنگ میں اس وقت صارفین کو 21 روپے فی یونٹ مل رہے ہیں۔ حکومت کی جانب سے اب یہ نرخ کم کر کے 11 روپے فی یونٹ کرنے پر غور کیا جا رہا ہے۔ جس کے بعد صارفین کو 10 روپے فی یونٹ کا نقصان ہو گا۔
بڑے پیمانے پر سولر پینلز نصب کیے جانے کے باعث کپیسٹی چارجز کی ادائیگی کے حوالے سے حکومت کا پلان عدم توازن کا شکار ہو گیا ہے۔
رپورٹ کے مطابق جس شخص کے پاس رقم ہے وہ سولر پینل انسٹال کر رہا ہے جبکہ بجلی کے چارجز کی ادائیگی کا بوجھ غریب صارفین پر منتقل ہو رہا ہے۔
یہ بھی پڑھیں: سوشل میڈیا پر منفی باتیں کرنے والوں کو تنبیہ کرتا ہوں، گورنر سندھ
سولر پینل لگوانے والے اپنی تمام لاگت صرف ڈیڑھ سال میں وصول کر رہے ہیں۔ حکومت چاہتی ہے کہ سولر پینل لگوانے کی لاگت وصول کرنے کا دورانیہ بڑھ کر 10 سال ہو جائے۔
رپورٹ کے مطابق اس وقت پاکستان میں 6 ہزار میگا واٹ بجلی پیدا کرنے کے قابل سولر پینل درآمد کیے جا چکے ہیں جبکہ شمسی توانائی سے بجلی کی پیداوار 3 ہزار میگا واٹ تک جا پہنچی ہے۔
