پی ٹی آئی کے سابق رہنما اور سابق گورنر سندھ عمران اسماعیل نے کہا ہے کہ تحریک انصاف دہشت گرد نہیں بلکہ محب وطن جماعت ہے جو برے حالات سے گزر رہی ہے، عمران خان سے ملاقات کا موقع ملا تو ضرور ملوں گا۔
نجی ٹی وی چینل سے گفتگو کرتے ہوئے انہوں نے کہا کہ پی ٹی آئی اداروں کو مضبوط کرنے والی اور ساتھ چلنے والی جماعت ہے۔ کوئی بھی حکومت اداروں کی سپورٹ کے بغیر نہیں چل سکتی، بانی پی ٹی آئی بھی کہتے تھے کہ یہ فوج ہماری ہے اور ہم ایک پیج پر ہیں۔
ایم کیو ایم پاکستان کے اندر وزارت اور گورنرشپ کو لیکر پھر شدید اختلافات
عمران اسماعیل کا کہنا تھا کہ مسلم لیگ (ن) اور پیپلزپارٹی کے درمیان ہونے والا یہ اتحاد انہونی ہے اور پیپلز پارٹی کا وفاقی کابینہ میں نہ جانے کا فیصلہ غیر معمولی ہے۔ ملین ڈالر سوال یہ ہے کہ کیا صدر زرداری ن لیگ کی حکومت کو کامیاب بنائیں گے؟
سابق گورنر سندھ نے کہا کہ نواز شریف فارم 45 کے مطابق ہار چکے ہیں، وہ 8 اور 9 فروری دونوں الیکشن ہار گئے۔ ایسے میں پیپلز پارٹی کا مستقبل کیا ہوگا جب بلاول بھٹو زرداری بھی وزیراعظم بننے کے لیے بے چین بیٹھے ہیں۔
انہوں نے کہا کہ پی ٹی آئی برے وقت اور حالات سے گزر رہی ہے، مجھے پی ٹی آئی چھوڑنے پر پچھتاوا ہے لیکن عمران خان سے تعلق برقرار ہے۔ ان سے احساس کا رشتہ ہے جو ہمیشہ قائم رہے گا۔
سابق چیئرمین پی ٹی آئی کو تین چار کمرے دیئے ہوئے ہیں، عطااللہ تارڑ کا انکشاف
ایک سوال کے جواب میں انہوں نے کہا کہ سابق صدر عارف علوی سے کراچی میں ایک شادی کی تقریب کے دوران ملاقات ہوئی لیکن انہوں نے سرد مہری سے یہ ملاقات کی شاید وہ مجھ سے ملنا نہیں چاہتے تھے۔
عمران اسماعیل نے مزید کہا کہ کل کی ایم کیو ایم ایک مضبوط جماعت تھی جبکہ آج اس کی پوزیشن کمزور تر ہو چکی ہے۔ آج ایم کیو ایم کو دیکھ لیں صرف ایک وزارت لے کر اسے ایک طرف کر دیا گیا ہے۔
