غزہ جنگ کے خاتمے کے لیے امریکی صدر ڈونلڈ ٹرمپ کی جانب سے پیش کیے گئے 20 نکاتی منصوبے کو ایک سال مکمل ہونے کے باوجود اس کے اہم اہداف تاحال حاصل نہیں ہوسکے۔
جنگ بندی کے باوجود غزہ میں اسرائیلی حملوں کا سلسلہ جاری ہے جبکہ اسرائیلی فوج نے تقریباً دو تہائی علاقے پر اپنا مؤثر کنٹرول قائم کرلیا ہے۔
ٹرمپ منصوبے کے ابتدائی مرحلے کے نتیجے میں 10 اکتوبر 2025 کو جنگ بندی ہوئی تھی، اس مرحلے میں حماس کے ہاتھوں موجود آخری اسرائیلی یرغمالیوں کی رہائی کے ساتھ اسرائیل کی جانب سے سینکڑوں فلسطینی قیدیوں اور زیرحراست افراد کو بھی رہا کیا گیا۔
سب سے زیادہ پڑھی جانے والی
تاہم منصوبے کے دوسرے اہم اہداف، جن میں حماس کا غیر مسلح ہونا، اسرائیلی فوج کا غزہ سے انخلا اور تباہ حال علاقے کی تعمیر نو شامل ہے تاحال عملی شکل اختیار نہیں کرسکے۔
ٹرمپ منصوبے میں کیا شامل تھا؟
20 نکاتی منصوبے کے پہلے مرحلے میں فوجی کارروائیوں کی معطلی، غزہ کے بعض علاقوں سے اسرائیلی فوج کا انخلا، یرغمالیوں اور فلسطینی قیدیوں کی رہائی اور انسانی امداد میں بڑے پیمانے پر اضافہ شامل تھا۔
منصوبے کے اگلے مراحل میں حماس کو غیر مسلح کرنا، غزہ کے انتظام کے لیے فلسطینی ٹیکنوکریٹک ادارہ قائم کرنا اور امریکی قیادت میں بننے والے بورڈ آف پیس کی نگرانی میں علاقے کی تعمیر نو شامل تھی۔
منصوبے کے تحت اسرائیلی فوج مرحلہ وار پیچھے ہٹتی اور اس کی جگہ ایک عارضی بین الاقوامی استحکامی فورس (ISF) غزہ میں سکیورٹی کی ذمہ داریاں سنبھالتی۔
جنگ بندی کے باوجود حملے جاری
جنگ بندی کے بعد غزہ میں مکمل پیمانے کی جنگ دوبارہ شروع نہیں ہوئی تاہم اسرائیلی حملے وقفے وقفے سے جاری رہے۔ غزہ کی وزارت صحت کے مطابق جنگ بندی کے بعد اب تک کم از کم 1,400 فلسطینی جاں بحق ہوچکے ہیں، جن میں خواتین اور بچے بھی شامل ہیں۔
اسرائیل کا مؤقف ہے کہ اس کی کارروائیوں کا ہدف حماس ہے اور تنظیم جنگ بندی کے دوران حملوں کی کوشش اور دوبارہ مسلح ہونے کی کوشش کر رہی ہے، تاہم حماس ان الزامات کی تردید کرتی ہے۔
اسرائیلی فوج کے مطابق جنگ بندی کے بعد فلسطینی جنگجوؤں کے حملوں یا لڑائی میں پانچ اسرائیلی فوجی بھی ہلاک ہوئے ہیں۔
اسرائیلی کنٹرول غزہ کے دو تہائی حصے تک پہنچ گیا
ٹرمپ منصوبے کے ابتدائی مرحلے میں اسرائیلی فوج کو ایک متعین ”یلو لائن“ تک پیچھے ہٹنا تھا، جس کے بعد بھی غزہ کے تقریباً 53 فیصد علاقے پر اسرائیلی کنٹرول برقرار رہتا۔
تاہم بعد میں اسرائیلی فوج نے اپنی پوزیشنیں مزید آگے بڑھا لیں اور اب تقریباً دو تہائی غزہ اسرائیلی فوج کے مؤثر کنٹرول میں ہے۔
اس پیش قدمی کے نتیجے میں مزید فلسطینی بے گھر ہوئے ہیں اور تقریباً 20 لاکھ آبادی ایک محدود ساحلی پٹی میں خیموں اور تباہ شدہ عمارتوں میں پناہ لینے پر مجبور ہے۔
امداد میں اضافہ، مگر ضرورت پوری نہیں ہو سکی
جنگ بندی کے بعد غزہ میں انسانی امداد کی فراہمی میں اضافہ ہوا، تاہم امدادی اداروں کے مطابق یہ اب بھی ضرورت سے کم ہے۔
عالمی غذائی تحفظ کی نگرانی کرنے والے ادارے آئی پی سی کے مطابق غزہ میں 12 لاکھ سے زائد افراد اب بھی شدید غذائی قلت کا سامنا کر رہے ہیں۔
رپورٹ کے مطابق جنگ بندی سے مئی کے اختتام تک اوسطاً روزانہ 227 ٹرک انسانی اور تجارتی سامان لے کر غزہ میں داخل ہوئے، جو منصوبے میں مقرر کردہ کم از کم 600 ٹرک یومیہ ہدف کے نصف سے بھی کم تھے۔
اسرائیل کا کہنا ہے کہ روزانہ تقریباً 600 ٹرک انسانی امداد اور تجارتی سامان لے کر غزہ میں داخل ہورہے ہیں اور ضروریات پوری کرنے کے لیے کافی سامان پہنچ رہا ہے۔
امدادی اداروں کا مؤقف ہے کہ بعض ضروری اشیا، جن میں خیموں کے دھاتی ڈنڈے، انجن آئل اور اسپیئر پارٹس شامل ہیں، سیکیورٹی خدشات کے باعث غزہ میں داخل نہیں ہونے دی جاتیں۔
حماس کے غیر مسلح ہونے کا معاملہ بھی حل نہ ہو سکا
حماس نے اپنے ہتھیاروں کے مستقبل کے حوالے سے لچک کا اشارہ دیا ہے تاہم اس معاملے پر بھی مذاکرات تعطل کا شکار ہیں۔
جولائی میں بورڈ آف پیس کی جانب سے پیش کیے گئے 15 نکاتی روڈ میپ میں حماس اور دیگر فلسطینی مسلح گروہوں سے ہتھیار حوالے کرنے کا مطالبہ کیا گیا تھا۔ منصوبے کے مطابق حماس کے غیر مسلح ہونے کے ساتھ اسرائیلی فوج غزہ سے انخلا کرتی اور بین الاقوامی استحکامی فورس نئی فلسطینی سیکیورٹی فورس کے ساتھ علاقے کی سکیورٹی سنبھالتی۔
حماس نے ہتھیار امریکی حمایت یافتہ فلسطینی ٹیکنوکریٹک حکومت کی تحویل میں دینے پر آمادگی ظاہر کی تاہم تنظیم نے اسے مکمل ”غیر مسلح ہونے“ کے بجائے ہتھیار محفوظ تحویل میں دینے کا عمل قرار دیا۔
اسرائیل نے مؤقف اختیار کیا ہے کہ جب تک حماس مکمل طور پر غیر مسلح نہیں ہوتی، اسرائیلی فوج غزہ سے انخلا نہیں کرے گی۔
بین الاقوامی فورس کا منصوبہ بھی مکمل نہ ہو سکا
غزہ میں تعیناتی کے لیے بین الاقوامی استحکامی فورس کے قیام کی منصوبہ بندی آگے بڑھی ہے، تاہم فورس ابھی عملی طور پر تشکیل نہیں دی جاسکی۔
امریکی میجر جنرل جیسپر جیفرز کو فورس کا کمانڈر مقرر کیا گیا ہے، جبکہ انڈونیشیا، مراکش، قازقستان، البانیہ، کوسوو اور یوگنڈا نے اہلکار فراہم کرنے پر آمادگی ظاہر کی ہے۔
منصوبے کے مطابق طویل مدت میں اس فورس میں تقریباً 20 ہزار فوجی شامل کیے جائیں گے اور 12 ہزار فلسطینی پولیس اہلکاروں کو تربیت دی جائے گی۔
غزہ کے انتظام کے لیے فلسطینی ٹیکنوکریٹک ادارہ نیشنل کمیٹی فار دی ایڈمنسٹریشن آف غزہ بھی جنوری میں تشکیل دیا گیا، تاہم یہ ادارہ تاحال غزہ میں عملی طور پر کام شروع نہیں کرسکا۔
تعمیر نو کا چیلنج
ایک سال گزرنے کے باوجود غزہ کے شہری تباہ شدہ عمارتوں کے ملبے سے خیموں اور عارضی پناہ گاہوں کے لیے قابل استعمال سامان تلاش کرنے پر مجبور ہیں۔
بورڈ آف پیس نے ستمبر میں غزہ کی تعمیر نو کے ابتدائی مرحلے کے لیے 2.45 ارب ڈالر کا منصوبہ پیش کیا تاہم یہ رقم مجموعی ضروریات کے مقابلے میں بہت کم ہے۔
یورپی یونین اور اقوام متحدہ کے اپریل میں جاری مشترکہ تخمینے کے مطابق غزہ کی بحالی اور تعمیر نو کے لیے آئندہ 10 برس میں تقریباً 71.4 ارب ڈالر درکار ہوں گے۔
غزہ کے مستقبل پر اسرائیل میں اختلاف
ٹرمپ منصوبے میں فلسطینیوں کو غزہ میں رہنے اور علاقے کی تعمیر نو کا وعدہ کیا گیا ہے تاہم اسرائیل کی دائیں بازو کی بعض سیاسی شخصیات فلسطینیوں کی مبینہ ”رضاکارانہ ہجرت“ کے مطالبات دہرا رہی ہیں۔
اسرائیلی وزیر دفاع اسرائیل کاٹز نے گزشتہ ماہ کہا تھا کہ غزہ کا کوئی حتمی حل فلسطینیوں کی ہجرت کے بغیر ممکن نہیں ہوگا۔
اسرائیلی حکومت نے 2025 میں غزہ سے ”رضاکارانہ ہجرت“ کی نگرانی کے لیے ایک دفتر بھی قائم کیا تھا، تاہم ٹرمپ بعد میں غزہ کے فلسطینیوں کو مستقل طور پر بے گھر کرنے کی تجویز سے پیچھے ہٹ گئے۔ عرب ممالک اور عالمی سطح پر بھی اس تجویز کی مخالفت کی گئی ہے۔
اسرائیلی حکام کا کہنا ہے کہ غزہ کی آبادی کو جبری طور پر منتقل کرنے کا کوئی منصوبہ نہیں۔
اسرائیل میں انتخابات بھی قریب
اسرائیل میں 27 اکتوبر کو عام انتخابات ہونے جارہے ہیں، جو 7 اکتوبر 2023 کے حماس حملے کے بعد ملک میں پہلے عام انتخابات ہوں گے۔
اپوزیشن کے بعض اہم رہنماؤں نے ٹرمپ کے غزہ منصوبے کی حمایت کی ہے، جبکہ رائے عامہ کے جائزوں میں نیتن یاہو کے حامی اور مخالف سیاسی دھڑوں کے درمیان سخت مقابلہ دکھایا جارہا ہے۔
یوں ایک سال بعد ٹرمپ کے منصوبے کا ابتدائی جنگ بندی مرحلہ تو برقرار ہے، لیکن حماس کا غیر مسلح ہونا، اسرائیلی انخلا، بین الاقوامی فورس کی تعیناتی اور غزہ کی بڑے پیمانے پر تعمیر نو جیسے بنیادی اہداف اب بھی حل طلب ہیں۔
