ملک کے مختلف علاقوں میں بارشوں کا آغاز ہو گیا ہے جس سے خشک سردی کا خاتمہ ہو جائے گا، جڑواں شہروں میں ہلکی بارش کا سلسلہ جاری ہے۔
محکمہ موسمیات کا کہنا ہے کہ ملک کے بیشتر علاقوں میں موسم سردرہنے کا امکان ہے، آزاد کشمیر اورگلگت بلتستان میں با رش اور برفباری کی پیشگوئی کی گئی ہے۔
اسلام آباد، راولپنڈی میں بارش جبکہ مری، گلیات اور گر دو نواح میں بارش اور برف باری متوقع ہے، خیبر پختونخوا میں چند مقا مات پربارش اور برفباری کا امکان ظاہر کیا گیا ہے۔
چترال، دیر، سوات، کوہستان، مالاکنڈ، کرم، خیبراور مہمندمیں بارش کی پیشگوئی ہے جبکہ وزیرستان میں چند مقا مات پر بارش اور پہاڑوں پر ہلکی برفباری متوقع ہے۔
گلگت بلتستان میں چند مقا مات پر ہلکی بارش اور پہاڑوں پر ہلکی برفباری کی پیشگوئی کی گئی ہے، شمالی بلوچستان میں مطلع جزوی ابر آلود رہنے کا امکان ہے۔
پنجاب، خیبر پختونخوا اور بالائی سندھ کے میدانی علا قوں میں دھند چھائے رہنے کا امکان ظاہر کیا ہے، لکی مروت، بنوں، ڈیرہ اسماعیل خان، دادو، گھوٹکی، خیر پور، کشمور اور پڈعیدن میں رات دھند چھائے رہنے کا امکان ہے۔
محکمہ موسمیات کے مطابق مغربی ہواؤں کے 31 جنوری تک ملک کے بالائی علاقوں پر موجود رہنے کا امکان ہے۔ اس سسٹم کے تحت کل تک گلگت بلتستان، کشمیر میں ہلکی سے درمیانی بارش جبکہ پہاڑوں پر برف باری کا امکان ہے۔
27 سے 31 جنوری تک چترال، دیر، سوات، ایبٹ آباد، مانسہرہ، ہری پور، کوہاٹ اور بنوں میں بارش کا امکان ظاہر کیا گیا ہے۔
اسلام آباد، خطہ پوٹھوہار میں کہیں ہلکی اور کہیں درمیانی بارش، پہاڑوں پر برف باری کا امکان جبکہ 30اور 31 جنوری کو گوجرانوالہ، سیالکوٹ، لاہور، سرگودھا میں بارش متوقع ہے۔
