پاکستان کرکٹ ٹیم کے کپتان بابر اعظم نے قومی ٹیم کو حوصلہ دیتے ہوئے کہا ہے کہ ہمیں کندھے سے کندھا ملا کر چلنا ہے، ہمت نہیں ہارنی، ہم اس ورلڈکپ میں دوبارہ اٹھ سکتے ہیں۔
پاکستان کرکٹ بورڈ (پی سی بی) کی جانب سے آفیشل یوٹیوب چینل پر قومی ٹیم کو جنوبی افریقا کے خلاف میچ کیلئے پریکٹس کرتے دیکھا جاسکتا ہے۔ ویڈیو میں کپتان بابر اعظم کھلاڑیوں کا حوصلہ بڑھانے میں مصروف ہیں۔
ورلڈکپ، جنوبی افریقا کیخلاف میچ میں پاکستانی کوچز قومی ٹیم کا خفیہ ہتھیار؟
اس موقع پر بابر اعظم کھلاڑیوں سے مخاطب ہوکر کہتے ہیں کہ ‘ہم ایسا بہت بار کر چکے ہیں کہ نیچے سے اوپر اٹھے ہیں لیکن جب ہم نیچے سے اٹھتے ہیں تو سیدھا ٹاپ پر جاتے ہیں، تمام کھلاڑی وہ وقت یاد رکھیں۔’
قومی ٹیم کے کپتان نے کہا کہ ‘ایک دوسرے کے ساتھ رہیں گے تو آسانی ہوگی، ہمیں ایک دوسرے سے کندھے سے کندھا ملا کر چلنا ہے۔ ہم نے پہلے بھی کرکے دکھایا ہے، ہم کم بیک کر چکے ہیں اور اب بھی ایسا کر سکتے ہیں، آپ لوگوں نے ہمت نہیں ہارنی۔’
خیال رہے کہ بھارت کی میزبانی میں جاری آئی سی سی ون ڈے ورلڈکپ کے 13 ویں ایڈیشن میں کل پاکستان اور جنوبی افریقا کی ٹیمیں مدمقابل آئیں گی۔ دونوں ٹیمیں چنئی کے ایم اے چدمبرم اسٹیڈیم کے میدان میں جیت کیلئے جان کی بازی لگائیں گی۔
