لاہور: پنجاب کی نگران حکومت نے 14 اگست کو ریلی نکالنے پر پابندی عائد کر دی۔
نگران وزیر اعلیٰ پنجاب کی زیر صدارت یوم آزادی پر امن و امان کے حوالے سے خصوصی اجلاس ہوا جس میں چیف سیکرٹری، ایڈیشنل چیف سیکرٹری داخلہ، انسپکٹر جنرل پولیس، ایڈیشنل آئی جی سپیشل برانچ، سی سی پی او، کمشنر، ڈپٹی کمشنر اور دیگر حکام نے شرکت کی۔
اجلاس کے دوران نگران وزیر اعلیٰ پنجاب محسن رضا نقوی نے آئی جی پنجاب کو صوبے بھر میں یوم آزادی پر فیملیز کو تحفظ فراہم کرنے اور نازیبا حرکات کرنے والے شرپسندوں کے خلاف سخت کارروائی یقینی بنانے کے لیے ہدایات جاری کر دیں۔
یہ بھی پڑھیں: نواز شریف آئندہ ماہ پاکستان روانہ ہوں گے، فیملی ذرائع
پنجاب کی نگران حکومت نے فیصلہ کیا کہ 14 اگست کو صرف اور صرف قومی پرچم لگانے اور لہرانے کی اجازت دی جائے گی جبکہ کسی بھی سیاسی جماعت کو ریلی نکالنے کی اجازت نہیں ہو گی۔
وزیر اعلیٰ محسن رضا نقوی نے عوامی مقامات پر ہلڑ بازی، بد نظمی پھیلانے، ون ویلنگ کرنے اور موٹر سائیکل میں آلٹریشن کرنے والے مکینک کے خلاف سخت کارروائی کرنے کا بھی حکم دے دیا۔
