ڈسٹرکٹ اینڈ سیشن کورٹ کی جانب سے دورانِ عدت نکاح کرنے کے الزام پر عمران خان اور بشریٰ بی بی کے خلاف کارروائی کیلئے دائر کمپلینٹ کی سماعت 28 اپریل تک ملتوی کردی گئی۔
روزنامہ ایکسپریس کے مطابق گزشتہ روز کیس پر سماعت ہوئی جس میں درخواست گزار محمد حنیف، سینئر سول جج نصر من اللہ کے روبرو عدالت میں پیش ہوئے۔ جونیئر وکیل نے عدالت کو بتایا کہ گواہ مفتی سعید بیان ریکارڈ کرانے کیلئے ساڑھے دس بجے آئیں گے۔
دورانِ سماعت درخواست گزار کی طرف سے مؤقف اختیار کیا گیا کہ چیئرمین پاکستان تحریک انصاف (پی ٹی آئی) عمران خان نے بشریٰ بی بی کے ساتھ عدت میں نکاح کیا۔ یہ قانوناً جرم ہے اور گناہ بھی ہے جس کی بنا پر عمران خان اور بشریٰ بی بی کے خلاف قانونی کارروائی کی جائے۔
سماعت دوبارہ شروع ہوئی تو گواہ مفتی سعید کے ملک میں نہ ہونے کی وجہ سے بیان ریکارڈ نہیں ہو سکا۔ درخواست گزار کے وکیل نے کہا کہ عدالت آئندہ کی تاریخ مقرر کردے، جس پر عدالت نے کیس کی مزید سماعت 28 اپریل تک ملتوی کردی۔
عدت میں نکاح کا الزام، عمران خان اور بشریٰ بی بی کیلئے نئی مشکل
خیال رہے کہ اسلام آباد کے ایک شہری نے سابق وزیراعظم عمران خان اور ان کی اہلیہ پر عدت کے دوران نکاح کرنے کا الزام عائد کیا تھا۔ شہری محمد حنیف نے اسلام آباد ڈسٹرکٹ اینڈ سیشن کورٹ میں درخواست دیتے ہوئے کارروائی کی استدعا کی تھی۔
