شہری نے سابق وزیراعظم عمران خان اور ان کی اہلیہ پر عدت کے دوران نکاح کرنے کا الزام عائد کر دیا۔
شہری محمد حنیف نے اسلام آباد ڈسٹرکٹ اینڈ سیشن کورٹ میں درخواست دیتے ہوئے کارروائی کی استدعا کی ہے۔
انہوں نے اپنی درخواست عمران خان، بشریٰ بی بی اور ریاست کو فریق بنایا ہے، شہری نے دونوں کے خلاف سیکشن 496 کے تحت کارروائی کی استدعا کرتے ہوئے موقف اختیار کیا کہ بشریٰ بی بی نے عدت پوری کئے بغیر نکاح کیا جو غیرقانونی ہے۔
محمد حنیف نامی شہری نے عمران خان اور بشریٰ بی بی کے نکاح کی کاپی بھی درخواست کے ساتھ منسلک کی، درخواست گزار نے عدالت میں اپنا ابتدائی بیان دیا جس کے بعد عدالت نے سماعت 8 اپریل کو مقرر کر دی۔
واضح رہے کہ نکاح خواں مفتی سعید خان کا نجی ٹی وی کے پروگرام میں کہنا تھا کہ انہوں نے عمران خان اور بشریٰ بی بی کا نکاح دو بار پڑھایا۔
مفتی سعید کا کہنا تھا کہ پہلا نکاح عدت کے دوران ہونے کی وجہ سے فاسد تھا، جب علم ہوا تو دوسری بار نکاح پڑھانا پڑا۔
