وزیر اعظم شہباز شریف ڈیرہ غازی خان میں سیلاب متاثرہ علاقوں کے دورے پر موجود ہیں، جہاں انہیں سیلاب متاثرین کی امداد پر بریفنگ بھی دی گئی۔
میڈیا سے بات کرتے ہوئے وزیراعظم نے کہا کہ آج میں سیلاب متاثرین سے اظہار افسوس کے لیے آیا ہوں، آفت کی اس گھڑی میں وفاقی اور پنجاب حکومت آپ کے ساتھ شانہ بشانہ کھڑے ہیں، میں جب وزیراعلیٰ تھا میں اور میری ٹیم دن رات متاثرین کے ساتھ موجود ہوتے تھے، میں نے موبائل کیمپس ، موبائل تندور لگائے تھے، اس وقت کسی چیز کی کمی ہونے نہیں دی۔
شہباز شریف نے کہا کہ ہم نے پسند ناپسند کو نہیں دیکھنا ملکر کام کرنا ہوگا، حکومت کی ذمہ داری ہے وہ متاثرین کی مدد کرے ، ہم صوبائی حکومتوں کے ساتھ ملکر کام کررہے ہیں، چیئرمین این ڈی ایم اے اور آرمی چیف سے امداد کی تقسیم میں شفافیت کی بات کی ہے، امدادی رقم کی تقسیم میں شفافیت کو سامنے رکھ رہے ہیں اور اس کے لیے سرو ے بھی کررہے ہیں.
کیونکہ سیلاب کے نقصانات کا جائزہ لینے کے لیے جوائنٹ سروے ضروری ہے۔ سیلاب متاثرین کے لیے میڈیکل اور ریلیف کیمپ بحال رکھنے چاہیے، سیلاب متاثرین کے لیے پنجاب حکومت کام کررہی ہے، ملک میں بارش کا ایک اور اسپیل متوقع ہے ہمیں تیار رہنا ہوگا۔
وزیراعظم کو سیلاب متاثرہ علاقوں کی بریفنگ میں بتایا گیا کہ ڈیرہ غازی خان میں سیلاب اور بارشوں سے لوگ متاثر ہوئے اور بڑے پیمانے پر فصلوں کو نقصان پہنچا ہے، سیلاب سے متاثرہ علاقوں میں ریسکیواور ریلیف کی کارروائیاں جاری ہیں۔
