منامہ: تاریخ میں پہلی بار عرب ممالک میں کسی اسرائیلی فوجی افسر کی تعیناتی کر دی گئی۔
غیر ملکی خبر رساں ایجنسی کے مطابق اسرائیلی افسر کی تعیناتی بحرین میں کی گئی ہے۔ بحرین نے اسرائیلی بحریہ کے اعلیٰ افسر کی تعیناتی کی تصدیق کرتے ہوئے کہا کہ یہ تعیناتی خطے میں جہازوں کی آزادانہ نقل و حرکت کو یقینی بنانے کے لیے کی گئی ہے۔
بحرینی وزارت خارجہ نے کہا کہ اسرائیلی افسر کی تعیناتی خطے میں محفوظ اور آزادانہ جہاز رانی کے لیے 34 سے زائد ممالک کے اتحاد کے ایجنڈے کے تحت کی گئی ہے۔ جس کا مقصد خلیجی ممالک کے سمندری حدود اور عالمی تجارتی جہازوں کی حفاظت سمیت اُن پر قذاقوں اور دہشت گردوں کے حملے سے بچانا ہے۔
یہ بھی پڑھیں: مسکان خان کو جاپانی تنظیم کا اسکالر شپ دینے کا اعلان
بحرین کی جانب سے اسرائیلی افسر کی تعیناتی سے متعلق تفصیلات بتانے سے گریز کیا گیا تاہم کہا جا رہا ہے کہ چند روز قبل اسرائیلی وزیر دفاع کی آمد پر طے پانے والے معاہدوں میں یہ تعیناتی بھی شامل تھی۔
واضح رہے کہ گزشتہ روز ایک اسرائیلی افسر کو بحرین میں پانچویں امریکی بحری بیڑے کے رابطہ افسر کے طور پر کام کرنے کے لیے مقرر کیا گیا ہے۔
