اسلام آباد: ملک بھر سے مطالبات کے حق آسلام آباد پہنچے ہوئے تاجر وزیراعظم ہاوس کی طرف مارچ کرنے سے پیچھے ہٹ گئے اور احتجاجی ریلی ختم کرنے کا اعلان کردیا۔
تاجروں نے ضلعی انتظامیہ کو چارٹرآف ڈیمانڈ پیش کردیا اور کہا کہ 31 جولائی تک مطالبات تسلیم نہ ہوئے تو دوبارہ اسلام آباد آئیں گے۔
اس سے قبل آسلام آباد پہنچے ہوئے تاجروں کو ضلعی انتظامیہ نے سرینہ چوک تک جانے کی اجازت دے دی تھی۔
تاجروں کی جانب سے سرینہ چوک پر جاکر احتجاج ختم کرنے کی شرط پر ضلعی انتظامیہ اور پولیس نے تاجروں کو سرینہ چوک جانے کی اجازت دے دی تھی۔
اس سے قبل گاریوں کے قافلوں میں اسلام آباد پہنچنے کے بعد تاجروں نے کشمیر ہائے وے کے ایک ٹریک کو بند کردیا تھا۔
آل پاکستان انجمن تاجران نعیم میر گروپ کے بینر تلے ’’ ہارن بجاو حکمران جگاو” احتجاجی تحریک کے تحت ملک بھر سے تاجر گاڑیوں میں ریلیوں کی شکل میں اسلام آباد پہنچے ہیں۔
ملک کے مختلف شہروں سے تاجر وزیراعظم ہاوس کی طرف مارچ کرنے کے لیے اسلام آباد آئے ہیں۔
ہم نیوز کے مطابق چھ سو سے زائد گاڑیوں پر مشتمل ریلی لاہور سے اسلام آباد پہنچ گئی ہے، جبکہ خیبر پختونخوا سے بھی تاجر اسلام آباد پہنچ گئے ہیں۔
ہم نیوز کے مطابق اس سے قبل اسلام آباد انتظامیہ نے تاجروں کو زیرو پوائنٹ پر روک دیا تھا۔
مزید پڑھیں: آل سٹی تاجر اتحاد نے پٹرولیم مصنوعات کی قیمتوں میں اضافہ مسترد کر دیا
اسلام آباد انتظامیہ نے زیروپوائنٹ کے پاس کشمیر ہائے وے کو بند کردیا تھا اور پولیس کی بھاری نفری تعینات کردی تھی۔
اسلام آباد انتظامیہ نے کنٹینر لگاکر تاجروں کو وزیراعظم ہاوس کی طرف مارچ کرنے سے روک دیا تھا۔ بکتربند گاڑیاں اور قیدی وینز کشمیر ہائی وے پر پہنچا دیے گئے تھے۔
ڈپٹی کمشنر اسلام آباد حمزہ شفقات کے مطابق تاجروں کی اسلام آباد کی طرف آنے والی ریلیوں کو روکنے کے لیے فیض آباد اور کشمیر ہائی وے بند کر دی گئی تھی۔
انہوں نے کہا تھا کہ ساڑھے 3 سے ساڑھے 6 تک زیرو پوائنٹ سے سرینہ تک روڈ بند رہے گی۔
اس سے قبل اسلام آباد روانگی سے قبل لاہور میں میڈیا سے گفتگو کرتے ہوئے آل پاکستان انجمن تاجران نعیم میر گروپ کے سربراہ نعیم میر نے کہا کہ حکومت نے بجٹ میں تاجروں کے لیے کچھ نہیں دیا ہے۔ یہ حکومت بلکل تاجر دوست نہیں ہے۔
انہوں نے کہا کہ آئندہ دو سے تین روز میں زیرو پوائنٹ سے وزیر اعظم ہائوس کی طرف مارچ کی تاریخ کا اعلان کر دیا جائے گا۔
مرکزی سیکرٹری جنرل نعیم میر نے کہا کہ گزشتہ روز آل پاکستان انجمن تاجران کے مرکزی و صوبائی قائدین کی ویڈیو کانفرنس ہوئی تھی جس میں حکومت کے خلاف احتجاجی تحریک چلانے کا فیصلہ کیا گیا تھا۔
انہوں نے کہا کہ ہماری تحریک کا مقصد حکومت کو گرانا نہیں بلکہ ان کو جگانا ہے تاکہ وہ ہمارے مسائل حل کریں۔ ہمارا مطالبہ ہے کہ تاجروں کا کاروبار کے اوقات کار بڑھانے اور ایس اوپیز کے تحت بند کاروبار کھولنے کی اجازت دی جائے۔
