اسلام آباد: جڑواں شہروں سمیت ملک کے بیشترعلاقوں میں صبح سویرے بادلوں نے ڈیرے ڈال لیے جس کے بعد سردی میں اضافہ ہو گیا ہے۔
لاہورمیں آج مختلف مقامات پرابرکرم برسنے کا امکان ہے۔ شہر میں کم ازکم درجہ حرارت7 ڈگری سینٹی گریڈ اور زیادہ سے زیادہ درجہ حرارت 18 سینٹی گریڈ رہے گا
محکمہ موسمیات کے وادی کوئٹہ میں ہلکی بوندا بادی کا سلسلہ بھی جاری ہے۔ شہر میں درجہ حرارت 7 ڈگری سینٹی گریڈ ریکارڈ کیا گیا ہے۔
اس کے علاوہ ڈیرہ اسماعیل خان اور اس کے مضافات میں بارش کا سلسلہ شروع ہو گیا ہے جس کے بعد سردی میں خاصا اضافہ ہو گیا ہے۔
سمندری اور اس کے گرد ونواح میں آسمان پر گہرے بادلوں کے ڈیرے ہیں۔ اس کے علاوہ تیز ہواوں اور ہلکی بوندا باندی کا سلسلہ وقفہ وقفہ سے جاری ہے۔ محکمہ موسمیات کے مطابق شہر میں مزید بارش کا امکان بھی ہے۔
محکمہ موسمیات نے بتایا کہ چمن سمیت شمالی بلوچستان کے مختلف علاقوں میں آج سے بارش اور برفباری کا امکان ہے۔ شیرانی، قلعہ سیف اللہ، لورالائی، قلعہ عبداللہ، زیارت اور میدانی علاقوں میں بارش کا سلسلہ جاری ہے جبکہ بالائی پہاڑی علاقوں میں برف باری برسانے والا سسٹم مغرب سے بلوچستان میں داخل ہو چکا ہے۔
آئندہ چوبیس گھنٹوں کے دوران کوئٹہ، ژوب، قلات، مکران، سبی، سکھر، لاڑکانہ، حیدرآباد اور کراچی میں کہیں کہیں بارش کا امکان ہے جبکہ مالاکنڈ ڈویژن، ہزارہ ڈویژن، مری ، گلیات، گلگت بلتستان اور کشمیر میں درمیانی سے شدید برفباری کی پیش گوئی کی گئی ہے۔
محکمہ موسمیات کے مطابق مالاکنڈ، ہزارہ، گلگت بلتستان اور کشمیر میں تیز بارش کے باعث لینڈ سلائیڈنگ کا خدشہ ہے لہذا مسافروں کو احتیاطی تدابیر کرنے کی ہدایت کی گئی ہے۔
سکردو میں درجہ حرارت نقطہ انجماد سے 20 درجہ گر گیا۔ اس کے علاوہ استور منفی 1، ،بگروٹ منفی 15، کالام منفی 14، گوپس منفی 12، ہنزہ منفی 08 جبکہ مری، چترال اورکاکول میں منفی 02 ڈگری سینٹی گریڈ ریکارڈ کیا گیا ہے۔
