قومی اسمبلی کا اجلاس ڈپٹی اسپیکر سید غلام مصطفیٰ شاہ کی صدارت میں منعقد ہوا، جس میں مقبوضہ جموں و کشمیر میں بھارتی مظالم کے خلاف مذمتی قرارداد کی منظوری، کراچی میں کے الیکٹرک کی غیر اعلانیہ لوڈشیڈنگ، اور شرحِ سود کے خاتمے سے متعلق توجہ دلاؤ نوٹسز کے علاوہ متعدد اہم بلوں کی منظوری دی گئی۔
مقبوضہ کشمیر میں بھارتی مظالم کے خلاف اور کشمیری عوام سے یکجہتی کے متعلق قرارداد اجلاس کے آغاز پر چیئرمین کشمیر کمیٹی قاسم نون نے مشترکہ طور پر پیش کی جسے ایوان نے متفقہ طور پر منظور کر لیا۔
قرارداد میں 27 اکتوبر 1947ء کو بھارتی جارحیت کا سیاہ ترین دن قرار دیا گیا اور اقوامِ متحدہ کی قراردادوں کے مطابق کشمیریوں کو ان کا بنیادی حقِ خودارادیت دینے پر زور دیا گیا۔
قومی اسمبلی اجلاس کے دوران یومِ سیاہ کشمیر کے موقع پر متفقہ قرارداد منظور کی گئی، جس میں بھارتی غیر قانونی زیرِ قبضہ جموں و کشمیر کے عوام کے ساتھ پاکستان کی غیر متزلزل یکجہتی اور اقوام متحدہ کی سلامتی کونسل کی متعلقہ قراردادوں کے مطابق ان کے حقِ خودارادیت کی غیر متزلزل حمایت کا اعادہ کیا گیا۔
قرارداد وفاقی وزیر و چیئرمین پارلیمانی کمیٹی برائے کشمیر رانا محمد قاسم نون اور وفاقی وزیر برائے کشمیر امور، گلگت بلتستان اور سیفران انجینئر امیر مقام نے پیش کی۔
قرارداد میں بھارتی غیر قانونی زیرِ قبضہ جموں و کشمیر میں انسانی حقوق کی خلاف ورزیوں کی مذمت کرتے ہوئے عالمی برادری پر زور دیا گیا کہ وہ تنازعِ کشمیر کے منصفانہ اور پائیدار حل کے لیے اپنا مؤثر کردار ادا کرے۔
#KashmirBlackDay— National Assembly 🇵🇰 (@NAofPakistan) October 27, 2026
ایوان نے کشمیریوں کی بے مثال قربانیوں کو خراجِ تحسین پیش کرتے ہوئے عالمی برادری سے بھارتی مظالم کا فوری نوٹس لینے کا مطالبہ کیا اور اعادہ کیا کہ پاکستان اپنے کشمیری بہن بھائیوں کی سیاسی، اخلاقی اور سفارتی حمایت جاری رکھے گا۔
’کراچی میں صرف ڈیڑھ گھنٹہ لوڈ شیڈنگ ہو رہی‘
اس کے علاوہ اجلاس میں ایم کیو ایم کے رہنما سید امین الحق نے کراچی میں جاری غیر اعلانیہ لوڈشیڈنگ، خراب فیڈرز کی عدم بحالی، اور کے الیکٹرک کی خراب کارکردگی سے متعلق توجہ دلاؤ نوٹس پیش کرتے ہوئے وزیر توانائی کی توجہ چاہی۔
نوٹس کا جواب دیتے ہوئے وفاقی پارلیمانی سیکرٹری پاور ڈویژن عامر طلال خان نے ایوان کو بتایا کہ بجلی کی بندش اکثر اوقات کسی ہنگامی ریپیئرنگ یا تکنیکی خرابی کی وجہ سے ہوتی ہے۔ انہوں نے کہا کہ کراچی میں بجلی کی مانگ 33 سو میگا واٹ کے قریب ہے جبکہ باقاعدہ سپلائی 29 سو رہتی ہے، لیکن درمیان میں اکتوبر کے پہلے 2 ہفتوں کے دوران ری گیسفائیڈ لیکویفائیڈ نیچرل گیس (آر این ایل جی) کی کمی کی وجہ سے بجلی کی قلت پیدا ہوئی تھی جو کہ درست کر لی گئی ہے اور اب کوئی کمی نہیں ہو گی۔
انہوں نے دعویٰ کیا کہ اس قلت کے دوران بھی انڈسٹری کو بجلی کی سپلائی مکمل طور پر بحال رہی جبکہ گھریلو صارفین کے فیڈرز پر صرف ایک سے ڈیڑھ گھنٹے کی لوڈ شیڈنگ کی گئی۔
اس پر امین الحق کو ایک اور سوال کا موقع دیا جس پر انہوں نے کے الیکٹرک پر سخت تنقید کرتے ہوئے کہا کہ کے الیکٹرک کا شمار ان کمپنیوں میں ہوتا ہے جسے عوام کرپشن کی وجہ سے شدید نفرت کی نگاہ سے دیکھتے ہیں اور یہ ادارہ کراچی میں ایک مافیا کے طور پر کام کر رہا ہے۔ ”اس نے ریاست کے اندر ریاست بنائی ہوئی ہے، نہ وہ نیپرا کی بات سنتی ہے، نہ وہ صوبائی حکومت کی بات سنتی ہے اور نہ وہ وفاقی حکومت کی بات سنتی ہے۔“
انہوں نے کہا ’صرف ڈیڑھ گھنٹے کی لوڈشیڈنگ‘ کے جواب کو مسترد کرتے ہوئے کہا کہ شہرِ قائد میں 12 گھنٹے، 16 گھنٹے، اور 18 گھنٹے کی 3 اقسام کی لوڈشیڈنگ کی جا رہی ہے اور شدید گرمی کے ساتھ ساتھ اب رات کے اوقات میں بھی بجلی بند کی جاتی ہے۔ کے الیکٹرک اربوں روپے کی اوور بلنگ کر کے کما رہی ہے، لیکن کراچی کی پاور جنریشن یا بنیادی انفراسٹرکچر کی بہتری کے لیے اس نے کچھ نہیں کیا۔
جواب میں پارلیمانی سیکرٹری نے تسلیم کیا کہ نیپرا کے مروجہ قوانین کے مطابق رات کے اوقات میں لوڈشیڈنگ کرنا سخت ممنوع ہے، اور اگر کراچی میں رات کو بجلی کی بندش کی جا رہی ہے تو حکومت اس کی فوری تحقیقات کرے گی۔
معاملے کی اہمیت کو مدِنظر رکھتے ہوئے ڈپٹی اسپیکر نے کے الیکٹرک کے اس معاملے کو قائمہ کمیٹی کے سپرد کر دیا۔
’شرح سود عام آدمی کی سہولت کیلئے بڑھائی گئی‘
علاوہ ازیں، جمیعت علمائے اسلام (ف) کی رکن نعیمہ کشور نے ملک میں شرحِ سود کی موجودہ سطح سے متعلق توجہ دلاؤ نوٹس پیش کرتے ہوئے حکومت کی معاشی پالیسیوں کو آڑے ہاتھوں لیا۔
نعیمہ کشور نے کہا کہ حکومت نے وعدہ کیا تھا کہ شرحِ سود میں فوری کمی کی جائے گی، لیکن مسلسل سفارتی رفت و آمد اور دعووں کے باوجود عوام کو کوئی ریلیف نہیں ملا اور شرحِ سود بڑھتی جا رہی ہے۔
توجہ دلاؤ نوٹس پر حکومت کا موقف دیتے ہوئے پارلیمانی سیکرٹری سعد وسیم نے کہا کہ مانیٹری پالیسی کمیٹی نے اکثریتی ووٹ سے شرح سود بڑھانے کا فیصلہ کیا جس کا مقصد مشرق وسطیٰ میں جاری صورتحال کے اثرات کو کم کرنا، ملکی معیشت کو بہتر کرنا، اور عام آدمی کو سہولت دینا ہے۔
اس پر نعیمہ شکور نے اعتراض اٹھایا کہ ”ہم سے تو یہاں بات کی گئی تھی کہ اگلے سال تک شرح سود کو 7 فیصد تک لے کر جائیں گے مگر یہ کونسی عوام کو سہولت دی گئی ہے کہ شرح سود 12 فیصد کر دی گئی ہے۔“ انہوں نے مزید کہا کہ پچھلے 4 سال کے دوران ہم نے 16 ارب روپے صرف سود ادا کیا ہے اور ساتھ ہی سودی نظام کے نقصانات پر روشنی ڈالی۔
جواباً پارلیمانی سیکرٹری نے وہی مؤقف دہراتے ہوئے کہا کہ اس بات کا اعتراف بھی کیا جانا چاہیے کہ حکومت شرح سود کو 22 فیصد سے 11 فیصد تک لے آئی۔ ان کے مطابق شرح سود میں اضافہ نہ کیا جاتا تو مہنگائی بڑھتی اور عام آدمی کا نقصان ہوتا۔ ”یہ اقدامات مہنگائی کم کرنے اور ملکی معیشت کو مستحکم کرنے کے لیے کیے گئے۔“
انہوں نے ہاؤس کو مزید بتایا کہ حکومت ملک سے سودی نظام کے خاتمے کے لیے سنجیدہ ہے اور ہماری پوری کوشش ہے کہ سال 2027/28 تک پاکستان کے معاشی نظام کو مکمل طور پر ’انٹرسٹ فری‘ (سود پاک) بنا دیا جائے۔
صحافیوں کا واک آؤٹ
اجلاس کے دوران پارلیمانی رپورٹرز اور صحافیوں نے وقت پر تنخواہوں کی عدم ادائیگی اور جبری برطرفیوں پر احتجاج ریکارڈ کراتے ہوئے نہ صرف قومی اسمبلی سے واک آؤٹ کیا بلکہ اجلاس کی کوریج روکنے کے بعد پریس گیلری بھی خالی کردی۔
During the National Assembly session, Minister of State for Finance and Revenue Mr. Bilal Azhar Kayani informed the House that, on the directions of Deputy Speaker Syed Ghulam Mustafa Shah, he had met parliamentary reporters in the Press Gallery following their walkout and listened to their concerns regarding the non-payment of salaries to reporters, press workers and employees of various television channels for several months.
The Minister of State said that he had requested details of the channels concerned, the number of affected reporters, press workers and employees, and the total outstanding salary payments. He assured the reporters that their concerns would be taken up and followed through. He also discussed the matter with Federal Minister for Information and Broadcasting Mr. Attaullah Tarar.
Mr. Bilal Azhar Kayani further informed the House that the Federal Minister for Information and Broadcasting had been regularly raising these matters with the Pakistan Broadcasters Association, following which payments relating to salaries and other outstanding matters had been released and certain actions taken in response to complaints. He added that the reporters had also raised concerns about the dismissal of media employees and that he had requested details of these cases.
The Minister of State assured the House that the details to be provided by the Parliamentary Reporters Association would be examined and that any gaps or shortcomings identified would be addressed. He also apprised the House of the reporters’ proposal to constitute a joint committee of both Houses of Parliament to examine their grievances in detail, adding that the suggestion would be conveyed to the Federal Minister for Information and Broadcasting.
The reporters also proposed a review of licensing conditions and other regulations governing television channels, along with stronger protections for journalists. The Minister of State requested them to develop these proposals further and informed the House that the Federal Minister for Information and Broadcasting would brief the House on the matter.
Emphasising the importance of parliamentary reporters in covering House proceedings, Mr. Bilal Azhar Kayani appealed to the reporters who had walked out to return to the Press Gallery and resume their coverage of the session.
#NASession @BilalAKayani @TararAttaullah
— National Assembly 🇵🇰 (@NAofPakistan) October 27, 2026
ملاقات کے بعد بلال اظہر کیانی نے اجلاس کو بتایا کہ انہوں نے متاثرہ اینکرز، رپورٹرز اور ورکرز کی تفصیلات اور بقایا جات کا ڈیٹا طلب کر لیا ہے اور اس معاملے پر وفاقی وزیرِ اطلاعات عطا اللہ تارڑ سے بھی بات کی ہے۔ انہوں نے وضاحت کی کہ وزیرِ اطلاعات پاکستان براڈکاسٹرز ایسوسی ایشن کے ساتھ مسلسل رابطے میں ہیں تاکہ تنخواہوں کی ادائیگی اور میڈیا ملازمین کی ملازمتوں کا تحفظ یقینی بنایا جا سکے۔
وزیرِ مملکت نے ایوان کو صحافیوں کی اس تجویز سے بھی آگاہ کیا کہ صحافیوں کے مسائل کے حل اور ٹی وی چینلز کے لائسنسنگ قوانین کا جائزہ لینے کے لیے پارلیمنٹ کی ایک مشترکہ کمیٹی قائم کی جائے۔
بلال اظہر کیانی نے پارلیمانی کارروائی کی کوریج میں صحافیوں کے بنیادی کردار کو سراہتے ہوئے بائیکاٹ کرنے والے رپورٹرز سے پریس گیلری میں واپس آ کر اجلاس کی کوریج دوبارہ شروع کرنے کی اپیل کی۔
حکومتی ارکان کے متعدد بل منظور
اجلاس میں قانون سازی کے عمل کے دوران ایک ہی دن میں متعدد اہم اور تاریخ ساز بل منظور کر لیے گئے، جبکہ حزبِ اختلاف اور پرائیویٹ ممبرز کی جانب سے پیش کیے جانے والے قانون سازی کے متعدد بلوں کو متعلقہ قائمہ کمیٹیوں کے سپرد کر دیا گیا۔
اجلاس کے دوران پاکستان پیپلز پارٹی کی رہنما نفیسہ شاہ نے ’کارپوریٹ سماجی ذمہ داری (CSR) کی بابت احکام وضع کرنے کا بل 2026‘ ایوان میں پیش کیا، جسے قومی اسمبلی نے متفقہ طور پر منظور کر لیا۔
اس کے ساتھ ہی پیپلز پارٹی کی سینئر رہنما شازیہ مری نے ’قانون شہادت 1984 میں مزید ترمیم کرنے کا بل 2026‘ پیش کیا، جسے ایوان نے بحث کے بعد منظور کر لیا۔
اراکینِ پارلیمنٹ شرمیلا فاروقی کی جانب سے پیش کردہ دو اہم بلز ’دارالحکومت اسلام آباد بزرگ شہری ترمیمی بل 2025‘ اور ’مجموعہ ضابطہ فوجداری ترمیمی بل (جدول- دوم) 2024‘ بھی قومی اسمبلی سے منظور ہو گئے۔
The House passed [The Islamabad Capital Territory Senior Citizens (Amendment) Bill, 2025]
The Bill was moved by MNA Dr. Sharmila Sahiba Faruqui Hashaam.
#NASession @sharmilafaruqi https://t.co/WfCRBn4X3g
— National Assembly 🇵🇰 (@NAofPakistan) October 27, 2026
مزید برآں، پیپلز پارٹی کی رکن سحر کامران کا پیش کردہ ’قومی کمیشن برائے حقوق بچگان ترمیمی بل 2025‘ اور ایم کیو ایم کے رہنما خواجہ اظہار الحسن کا ’فوجداری قانون ترمیمی بل 2025‘ بھی ایوان نے کثرتِ رائے سے منظور کر لیا۔
انسداد ریپ سمیت متعدد بل کمیٹی کو بھیج دیے گئے
اجلاس میں اس وقت دلچسپ اور بحث طلب صورتحال پیدا ہوئی جب پاکستان تحریکِ انصاف (پی ٹی آئی) کی رکن شاندانہ گلزار نے ‘انسدادِ زناء بالجبر (تفتیش و سماعتِ مقدمہ) ایکٹ ‘2021 میں ترمیم کے بل کو زیر غور لانے کی تحریک پیش کرتے ہوئے کہا کہ سینیٹ بھی یہ بل منظور کر چکی ہے۔
اس پر وفاقی وزیر قانون اعظم نذیر تارڑ نے وضاحت کرتے ہوئے کہا کہ یہ پورا عمل اور تفتیشی نظام پہلے سے ہی آپریشنل (فعال) ہے۔ ریپ کے مجرموں کا رجسٹر اپ ڈیٹ رکھا جا رہا ہے اور ساری معلومات وہاں شیئر ہوتی ہیں جبکہ نیشنل پولیس بیورو اس سارے ریکارڈ کا محافظ ہے۔
انہوں نے کہا کہ یہ بل وہی بات دہرا رہا ہے جس پر پہلے سے عمل کیا جا رہا ہے، اسی لیے وزارت انسانی حقوق اور وزارت قانون نے اس بل مخالفت کی ہے۔ انہوں نے مزید واضح کیا کہ یہ معاملہ رولز کی مد میں رکھا گیا ہے کیونکہ وقتاً فوقتاً تبدیلیوں کی ضرورت پڑتی ہے جس پر ہر بار یہ اسمبلی میں لانا پڑتا لہذا اس پر ووٹنگ کرا لی جائے۔
جواب میں شاندانہ گلزار نے ہاؤس پر الزام لگایا کہ ”اکثر جب بھی کوئی اینٹی ریپ قانون کی بات ہوتی ہے تو ہم اسے خواتین کا معاملہ سمجھ کر ایک طرف رکھ دیتے ہیں، یہ گھناؤنا جرم بچوں کیساتھ بھی ہو رہا ہے اور بچیوں کے ساتھ بھی، کوئی بھی اس سے بچا ہوا نہیں ہے۔“
انہوں نے کہا کہ جہاں تک وزیر قانون نے رولز کی بات ہے، یہ بل عادی مجرموں کے ریکارڈ، ٹریول نوٹی فیکیشن، اور لانگ ٹرم مانیٹرنگ کی خلیج پوری کرتا ہے جو رولز میں بھی نہیں ہیں۔
شاندانہ گلزار نے مطالبہ کیا کہ یہ قانون سازی انتہائی ناگزیر ہے کیونکہ ایسے واقعات نہ صرف خواتین بلکہ بچوں اور بچیوں کے ساتھ بھی پیش آ رہے ہیں، لہٰذا اسے بے شک قائمہ کمیٹی کو بھیجج دیا جائے لیکن مسترد نہ کیا جائے۔
اس پر وزیر قانون نے کہا کہ کوئی عورت مرد کے فرق کی بات نہیں ہے، ’میرے اپنے بچے ہیں‘۔ ان کا دعویٰ تھا انہوں نے ڈیڑھ سال لگا کر یہ سارے رولز بنائے جن میں اسٹیک ہولڈرز کو بھی آن بورڈ لیا گیا۔ انہوں نے کہا نیشنل پولیس بیورو میں پورا ڈیجیٹل سسٹم بنا ہوا ہے جہاں مجرموں کا ریکارڈ اپڈیٹ ہوتا ہے اور ساتھ ہی شاندانہ گلزار کو اس نظام کے معائنے کی دعوت دی۔
انہوں نے کہا کہ اس مقصد کے لیے ایک مکمل یونٹ اور ڈیجیٹل سسٹم بنا رکھا ہے، ہر چیز رولز میں واضح کر دی گئی، تاہم، اگر اپوزیشن رکن اسے کمیٹی میں بھیجنا چاہتی ہیں تو ہمیں کوئی اعتراض نہیں ہے۔
اس پر جے یو آئی (ف) کی رکن عالیہ کامران کی جانب سے بل کو قائمہ کمیٹی کے سپرد کرنے کی ترمیم منظور کر لی گئی اور بل متعلقہ قائمہ کمیٹی کو بھیج دیا گیا۔
اس کے علاوہ بھی شاندانہ گلزار کی جانب سے پیش کیے جانے والے تمام بل بشمول ’اسلام آباد تحدیدِ کرایہ ترمیمی بل 2025‘، ’تنخواہوں کی ادائیگی ترمیمی بل 2025‘، ’تحفظِ قومی شاہرات ترمیمی بل 2025‘، ’صوبائی موٹر گاڑیاں ترمیمی بل 2025‘ اور ‘ فیکٹریز ایکٹ ترمیمی بل 2025’ کو قائمہ کمیٹیوں کے سپرد کر دیے گئے۔
قبائلی اضلاع، جنوبی پنجاب، بلوچستان، اور اقلیتوں کے مسائل پر اظہار خیال
قانون سازی کے مراحل کے بعد اراکین اسمبلی کو اظہار رائے کا موقع دیا گیا جس دوران مختلف علاقوں کی نمائندگی کرنے والے ممبران نے مختلف نوعیت کے مسائل پر روشنی ڈالی۔
مسلم لیگ (ن) کے رکن جمال شاہ کاکڑ نے ایوان میں اظہارِ خیال کرتے ہوئے کہا کہ کوئٹہ میں بجلی اور گیس کا شدید بحران ہے جسے فوری طور پر ختم کیا جائے۔ انہوں نے نشاندہی کی کہ ژوب، لورالائی، قلعہ سیف اللہ، کوہلو اور ڈیرہ بگٹی پچھلے 70 سال سے ’ٹیکس فری زون‘ تھے، لیکن اب ان علاقوں پر ٹیکس لاگو کر دیے گئے ہیں جس سے مہنگائی، بے روزگاری اور اسٹریٹ کرائم میں اضافہ ہوگا، لہٰذا وزیراعظم سے اپیل ہے کہ یہ ٹیکسز فی الفور ختم کیے جائیں۔ انہوں نے بلوچستان میں نامعلوم افراد کی فائرنگ سے قتل ہونے والے طالبعلم کے اہل خانہ کی مالی امداد اور صوبے میں ٹرین سروسز باقاعدگی سے چلانے کا بھی مطالبہ کیا۔
دوسری جانب، اقلیتی رکن رمیش لال نے ہندو برادری کے آنے والے مذہبی تہوار کا ذکر کرتے ہوئے کہا کہ 8 تاریخ کو دیوالی ہے جبکہ آگے کرسمس اور بابا گرونانک کا جنم دن بھی آ رہا ہے۔ انہوں نے اپیل کی کہ اقلیتوں کے ان تینوں ایونٹس کے موقع پر غریب خاندانوں کے لیے کم از کم 10 ہزار روپے فی کس فنڈ یا مالی گرانٹ فراہم کی جائے تاکہ وہ بھی خوشی منا سکیں۔
رمیش لال کے مطالبات کا جواب دیتے ہوئے وزیرِ مملکت برائے مذہبی امور کھیل داس کوہستانی نے ایوان کو بتایا کہ وزارتِ مذہبی امور اقلیتوں کے تہواروں کا پورا خیال رکھتی ہے، تاہم وزارت کا کل فنڈ صرف 6 کروڑ روپے ہے۔ انہوں نے وضاحت کی کہ مذہبی ہم آہنگی کی فروغ کے لیے کام کیا جا رہا ہے اور وفاق کے ساتھ ساتھ تمام صوبائی حکومتوں نے بھی اقلیتوں کی ویلفیئر اور تہواروں کے لیے اپنے اپنے بجٹ میں مخصوص فنڈز رکھے ہوئے ہیں۔
اجلاس میں قبائلی اضلاع، جنوبی پنجاب، ڈیرہ اسماعیل خان اور وفاقی دارالحکومت کے مسائل پر بھی بات ہوئی۔
قبائلی ضلع کرم سے ممبر قومی اسمبلی حمید حسین نے ایوان کی توجہ اپنے علاقے کی مخدوش صورتحال کی جانب مبذول کراتے ہوئے حکومت سے اپیل کی کہ جن متاثرین کے گھر مسمار ہو چکے ہیں انہیں فوری طور پر مالی معاوضہ دیا جائے۔
انہوں نے کہا کہ علاقے کی مرکزی شاہراہوں اور نیٹ ورک کو فوری بحال کیا جائے تاکہ عوام کی معاشی مشکلات اور تکلیف کا خاتمہ ہو سکے اور وہ پرامن زندگی گزار سکیں۔
جنوبی پنجاب کے مسائل اور اقلیتی حقوق پر بات کرتے ہوئے رکن قومی اسمبلی نوید عامر نے مطالبہ کیا کہ جنوبی پنجاب کو فوری طور پر الگ صوبہ بنایا جائے۔ انہوں نے اقلیتی برادری کو ملنے والی معمولی گرانٹ پر سخت تشویش کا اظہار کرتے ہوئے کہا کہ ”چار پانچ لاکھ روپے دے کر غریب کمیونٹی کے ساتھ مذاق کرنا بند کیا جائے۔ اگر پاکستان کے پرچم کا سفید رنگ اقلیتوں کا مظہر ہے تو اسے نظرانداز کیوں کیا جاتا ہے؟“
انہوں نے سوال اٹھایا کہ جب صوبائی اور وفاقی اسمبلیوں کے دیگر اراکین کو ترقیاتی فنڈز ملتے ہیں تو اقلیتی ایم این ایز کو فنڈز سے محروم کیوں رکھا جاتا ہے؟
علاوہ ازیں، فتح اللہ خان نے ڈیرہ اسماعیل خان میں سیلاب سے متاثرہ دیہاتوں کی بحالی اور انہیں ہنگامی امداد فراہم کرنے کا زوردار مطالبہ کیا۔
دوسری جانب، پی ٹی آئی کے رہنما شیر افضل مروت نے اسلام آباد میں سی ڈی اے کی جانب سے جاری درختوں کی کٹائی اور سیکیورٹی ناکوں پر شدید تنقید کی۔
انہوں نے کہا کہ اسلام آباد کا اصل حسن اس کا سبزہ اور قدرتی ماحول ہے، لہٰذا ایوان کی ایک کمیٹی اس بات کا جائزہ لے کہ ترقیاتی پروجیکٹس اہم ہیں یا شہر کا قدرتی حسن۔
انہوں نے اسلام آباد میں جگہ جگہ لگائے گئے سیکیورٹی ناکوں اور رکاوٹوں پر اعتراض اٹھاتے ہوئے کہا کہ شہریوں اور خود اراکینِ اسمبلی کو پارلیمنٹ لاجز جانے کے لیے طویل راستے اور دشواری کا سامنا کرنا پڑتا ہے، کیونکہ سرکاری اداروں نے شہریوں کے حقوق اور نقل و حرکت پر ’یلغار‘ کر رکھی ہے۔
شیر افضل مروت نے خیبر پختونخوا کی ضلعی حکومتوں کی تشکیل نو پر بھی سوالات اٹھائے۔
اس کے علاوہ کرن حیدر، نعیمہ شکور، عالیہ کامران، شرمیلا فاروقی سمیت متعدد ممبران نے مقبوضہ کشمیر کے مسلمانوں کے ساتھ اظہار یکجہتی کرتے ہوئے بھارتی مظالم کی مذمت کی اور مسئلہ کشمیر کا اقوام متحدہ کی قراردادوں کے مطابق حل کا مطالبہ کیا۔
ممران کے اظہار خیال کے بعد ڈپٹی اسپیکر نے قومی اسمبلی کا اجلاس کل صبح 11 بجے تک ملتوی کر دیا۔
