آغاخان پنجم پرنس رحیم نے پاک بھارت کشیدگی کے خاتمے کیلئے ثالثی کی پیشکش کردی۔
پرنس رحیم آغاخان نے پاکستان اور بھارت کے وزرائےاعظم اور سیکریٹری جنرل یواین کو بھی اس معاملے میں کردار ادا کرنے کیلئے خط لکھا ہے۔
انہوں نے خط میں کہا ہے کہ بڑھتی ہوئی پاک بھارت کشیدگی پرشدید تشویش ہے،دعا ہے کہ مسئلہ پرامن طور پر حل ہو اور مزید جانی نقصان نہ ہو۔
چین کی پاک بھارت کشیدگی میں کمی کےلیے کردار ادا کرنے کی پیشکش
اس سے پہلے امریکا اور چین میں دونوں ممالک کو تحمل کا مظاہرہ کرنے اور ثالثی کی پیشکش کر چکے ہیں۔
چین نے خطے کی موجودہ صورتحال پر تشویش کا اظہار کرتے ہوئے کہا ہے کہ خطے کی موجودہ صورتحال کو قریب سے دیکھ رہے ہیں، پاکستان اور بھارت تنازع کے سیاسی حل کی جانب واپس آئیں، بات چیت سے مسائل کا حل نکالیں۔
چینی وزارت خارجہ کی جانب سے کہا گیا ہے کہ پاکستان اور بھارت تحمل کا مظاہرہ کریں، فریقین امن اور استحکام کے وسیع تر مفاد میں کام کریں۔
چین نے زور دیا کہ دونوں ممالک پرامن ذرائع سے سیاسی تصفیہ کی راہ پر واپس آئیں۔
چین نے اپیل کی کہ دونوں ممالک کسی بھی ایسی کارروائی سے گریز کریں جس سے کشیدگی میں مزید اضافہ ہو، یہ نہ صرف بھارت اور پاکستان کے بنیادی مفاد میں ہے بلکہ پورے خطے کے امن و استحکام کے لیے بھی ضروری ہے۔
چینی دفتر خارجہ نے مزید کہا ہے کہ یہی وہ بات ہے جس کی بین الاقوامی برادری بھی توقع رکھتی ہے، چین اس سلسلے میں تعمیری کردار ادا کرنے کے لیے تیار ہے۔
