راولپنڈی: خیبر پختونخوا کے 3 مختلف علاقوں میں سیکیورٹی فورسز کی کارروائیوں کے دوران 22 خارجی ہلاک اور 6 زخمی ہو گئے۔
پاک فوج کے شعبہ تعلقات عامہ (آئی ایس پی آر) کے مطابق فائرنگ کے تبادلے میں 6 جوان بھی شہید ہوئے۔
ٹانک کے علاقے گل امام میں خفیہ اطلاعات پر آپریشن کیا گیا۔ جس میں 6خارجی ہلاک اور 6 زخمی ہوئے۔ شمالی وزیرستان میں آپریشن کے دوران 10 خارجی ہلاک ہوئے۔ جبکہ ضلع ٹل میں سیکیورٹی فورسز نے چوکی پر حملے کی کوشش ناکام بنا دی۔ تاہم شدید فائرنگ کے تبادلے میں 3 خارجی ہلاک یوئے۔
ٹل میں فائرنگ کے تبادلے میں 6 جوان دھرتی پر قربان ہوئے۔ 39 سالہ نائب صوبیدار محمد خالد شہید کا تعلق ضلع کوہاٹ سے ہے۔ نائب صوبیدار محمد خالد شہید نے 22 سال سے زائد دفاع وطن کا مقدس فریضہ سر انجام دیا۔ نائب صوبیدار محمد خالد شہید کے سوگواران میں والد اور اہلیہ شامل ہیں۔
35 سالہ حوالدار جدید علی شہید کا تعلق ضلع اورکزئی سے ہے۔ انہوں نے 17 سال سے زائد پاک فوج میں گزارے۔ حوالدار جدید علی شہید کے سوگواران میں والد اور اہلیہ شامل ہیں۔ 28 سالہ لانس نائیک ولایت حسین شہید ضلع کرم کے رہائشی ہیں۔ اور انہوں نے 9 سال تک وطن عزیزکی حفاظت کی۔ لانس نائیک ولایت حسین شہید کے سوگواران میں والد اور اہلیہ شامل ہیں۔
یہ بھی پڑھیں: سیاست نفرت اور دشمنی میں بدل چکی ہے، شاہد خاقان عباسی
30 سالہ لانس نائیک صفت اللہ شہید کا تعلق ضلع خیبر سے ہے۔ جنہوں نے 7 سال پاک فوج میں گزارے۔ لانس نائیک صفت اللہ شہید کے سوگواران میں والدین اور اہلیہ شامل ہیں۔ 27 سالہ لانس نائیک شہید رحمان شہید کا تعلق کرم سے ہے۔ اور انہوں نے 8 سال تک وطن عزیز کا دفاع کیا۔ لانس نائیک شہید رحمان شہید کے سوگواران میں والدین شامل ہیں۔
27 سالہ سپاہی نظام الدین شہید کا تعلق جنوبی وزیرستان سے ہے۔ اور انہوں نے 5 سال پاک فوج میں گزارے۔ سپاہی نظام الدین شہید کے سوگواران میں والدین شامل ہیں۔
