میانوالی: پنجاب پولیس نے میانوالی کے تھانہ چاپری پر خوارجی دہشت گردوں کا حملہ ناکام بناتے ہوئے 4 دہشت گردوں کو ہلاک کر دیا۔
پنجاب پولیس کے ترجمان کی جانب سے جاری بیان کے مطابق تھانہ چاپری میانوالی پر خوارجی دہشت گردوں نے اچانک حملہ کیا۔ تاہم پولیس نے دہشت گردوں کا حملہ ناکام بنا دیا۔
انہوں نے کہا کہ خیبرپختونخوا سے متصل پنجاب کی بین الصوبائی سرحد پر عیسیٰ خیل سرکل کے تھانہ چاپری پر دہشت گرد حملہ آور ہوئے۔ 20 سے زائد دہشت گردوں نے بھاری اسلحے کے ساتھ تھانہ پر اچانک حملہ کیا۔
ترجمان پنجاب پولیس نے کہا کہ پولیس اور خوارجی دہشت گردوں کے درمیان شدید فائرنگ کا تبادلہ ہوا۔ جبکہ دہشت گردوں نے تھانے کی عمارت پر راکٹ لانچرز برسائے اور ہینڈ گرنیڈز بھی پھینکے۔ تاہم تھانہ چاپری کا تمام عملہ محفوظ رہا۔
انہوں نے بتایا کہ دہشت گردوں کے حملے میں 2 پولیس اہلکار معمولی زخمی ہوئے۔ تاہم پولیس کی جوابی فائرنگ سے 2 خوارجی دہشت گرد ہلاک ہو گئے۔
یہ بھی پڑھیں: سیکیورٹی فورسز کے خیبرپختونخوا میں 2مختلف آپریشنز ،8خارجی ہلاک ،کیپٹن سمیت 2 جوان شہید
ترجمان پنجاب پولیس کے مطابق واقعے کے بعد ڈی پی او میانوالی اختر فاروق، سینئر پولیس افسران موقع پر پہنچ گئے۔ اور آئی جی پنجاب ڈاکٹرعثمان انور نے دہشت گردوں کا حملہ ناکام بنانے پر میانوالی پولیس کو شاباشی دی۔
آئی جی پنجاب نے کہا کہ پنجاب پولیس ہمہ وقت الرٹ ہے۔ دہشت گردوں کے ناپاک عزائم کو خاک میں ملا کر دم لیں گے۔ اور پنجاب پولیس امن دشمن عناصر کا اسی طرح جواں مردی سے مقابلہ کرتی رہے گی۔
