پیرس: ارجنٹائن کے اسٹار فٹبالر لیونل میسی نے 8 ویں مرتبہ 2023 کے بہترین کھلاڑی کا ایوارڈ ‘بیلن ڈی آر’ جیت لیا۔
غیر ملکی خبر رساں ایجنسی کے مطابق پیرس میں منعقد ہونے والی تقریب میں لیونل میسی کو سال 2023 کا بہترین کھلاڑی قرار دے دیا گیا وہ 8 بار “بیلن ڈی آر” ایوارڈ جیتنے والے پہلے فٹبالر بن گئے ہیں۔
اسٹار فٹبالر لیونل میسی کا ورلڈ کپ 2022 میں ارجنٹائن کو 36 سال بعد تیسری بار چیمپیئن بنوانے میں اہم کردار رہا۔ میسی نے ورلڈکپ 2022 میں 7 گول مارے، 3 گول میں مدد کی جبکہ انہوں نے گزشتہ سیزن کے دوران 41 میچوں میں 21 گول اسکور کیے۔
لیونل میسی نے پہلی مرتبہ بیلن ڈی آر ایوارڈ 2009 میں جیتا تھا جبکہ 2010، 2011، 2012، 2015، 2019 اور 2021 میں بھی یہ ایوارڈ میسی کے نام رہا، گزشتہ سال بیلن ڈی آر ایوارڈ فرانسیسی فٹبالر کریم بینزیما کے نام رہا تھا۔
پرتگال کے کرسٹیانو رونالڈو نے بیلن ڈی آر ایوارڈ 5 بار اپنے نام کیا اور انہوں نے آخری بار 2017 میں سال کے بہترین فٹبالر کا ایوارڈ جیتا تھا۔
ارجنٹائن کی ٹیم کے ہی امیلیانو مارٹینیز نے بہترین گول کیپر کی یاشن ٹرافی بھی جیت لی۔
یہ بھی پڑھیں: انضمام الحق نے چیف سیلکٹر کے عہدے سے استعفیٰ دیدیا
انگلینڈ اور ریال میڈرڈ کے مڈ فیلڈر جوڈ بیلنگھم کو کوپا ایوارڈ سے نوازا گیا۔ انہیں سال کا بہترین فٹبالر قرار دیا گیا جبکہ ریال میڈرڈ کے ونی جونیئر انسانیت کے لیے کام کرنے والے بہترین فٹبالر قرار پائے۔ بہترین فٹبال ٹیم کا ایوارڈ مانچسٹر سٹی کے نام رہا۔
بارسلونا ویمن ٹیم نے سال کی بہترین فٹبال ٹیم کا ایوارڈ جیت لیا اور اسپین اور بارسلونا کی جانب سے کھیلنے والی ایتانا بونماٹی سال کی بہترین خاتون فٹبالر قرار پائیں۔ ایمیلیانو مارٹنیز سال کے بہترین گول کیپر کا ایوارڈ لے گئے اور ایرلنگ ہالینڈ سیزن میں سب سے زیادہ گول کرنے کے ایوارڈ کے حق دار قرار پائے۔
