تہران: ایرانی ہیکروں نے لائیو خبرنامے کے دوران سرکاری چینکل ہیک کر کے آیت اللہ خامنہ ای کے خلاف پیغامات نشر کر دیئے۔
غیر ملکی خبر رساں ایجنسی کے مطابق ایران میں طالبہ مھسا امینی کی پولیس حراست میں موت کے خلاف احتجاج کرنے والے ایرانی ہیکروں نے سرکاری چینل “آئی آر آئی بی” ہیک کیا۔
ایرانی سرکاری ٹی وی چینل اس وقت ہیک کیا گیا جب 6 بجے کا خبرنامہ براہ راست چل رہا تھا اور آیت اللہ خامنہ ای کا بیان جاری تھا کہ اچانک اسکرین پر ایک ماسک آ گیا اور پھر آیت اللہ خامنہ ای کی تصویر کے گرد شعلے نظر آنے لگے۔
یہ بھی پڑھیں: بائیڈن انتظامیہ کےاعلیٰ عہدایداروں کی اہم افغان طالبان رہنماسےملاقات
ہیکرز کے گروہ نے اپنا نام عدالت علی بتایا جو اسکرین پر بھی نظر آ رہا تھا۔ اس دوران ایرانی رہبر اعلیٰ آیت اللہ خامنہ ای کی تصویر کے ساتھ بندوق کا نشان بنایا گیا اور نیچے مھسا امینی کے ساتھ تین دیگر خواتین کی تصاویر بھی دکھائی گئیں جو حالیہ مظاہروں میں جاں بحق ہوئی تھیں۔
ہیکرز کی جانب سے اسکرین پر پیغام بھیجا گیا کہ آپ ہمارے ساتھ اس میں شامل ہوں اور آواز اٹھائیں۔ ایک اور پیغام میں کہا گیا کہ ہمارے نوجوانوں کا خون آپ کے ہاتھوں سے بہہ رہا ہے۔ پیغام میں زن، زندگی اور آزادی کے نعرے بھی لگائے گئے۔
