وزیراعلیٰ پنجاب سردار عثمان بزدار نے مری میں برف باری میں پھنسے لوگوں کو بحفاظت نکالنے کیلئے ریسکیو آپریشن مزید تیز کرنے کا حکم دے دیا۔
وزیر اعلیٰ پنجاب نے مری میں ایمرجنسی کے نفاذ کا اعلان کرتے ہوئےآپریشن تیز کرنے کا حکم دے دیا۔ عثمان بزدار کا کہنا ہے کہ سیاحوں کو محفوظ مقامات پر منتقل کرنے کیلئے تمام وسائل بروئے کار لائے جائیں۔
مری کو آفت زدہ قرار دے دیا گیا ہے۔ وزیراعلیٰ پنجاب نے اپنا ہیلی کاپٹر بھی ریسکیو سرگرمیوں کے لیے دے دیا۔موسم بہتر ہوتے ہی ہیلی کاپٹر امدادی سرگرمیوں میں حصہ لے گا۔مری میں تمام ریسٹ ہاؤسز اور سرکاری اداروں کو سیاحوں کیلئے کھول دیا گیاہے۔
ان کا کہنا ہے کہ انتظامیہ، پولیس اور ریسکیو 1122 کے افسران اور عملہ امدادی سرگرمیاں مزید تیز کرے۔ سیاحوں کو ضروری امدادی اشیاء بھی فراہم کی جائیں۔وزیراعلیٰ عثمان بزدار نے ریسکیو آپریشن کیلئے راولپنڈی اور دیگر شہروں سے اضافی مشینری اور عملہ مری بھجوانے کی ہدایت بھی کردی۔
وزیراعلیٰ عثمان بزدار نے مری میں بعض افراد کے جاں بحق ہونے کے واقعہ پر گہرے دکھ اور افسوس کا اظہار بھی کیا ہے ۔ ان کا کہنا ہے کہ ہماری تمام تر ہمدردیاں جاں بحق افراد کے لواحقین کے ساتھ ہیں۔ حکومت سوگوار خاندانوں کے غم میں برابر کی شریک ہے۔
واضح رہے کہ مری میں شدید برفباری اور سیاحوں کی بڑی تعداد پھنس جانے کے باعث 16 سے 19 افراد جاں بحق ہو چکے ہیں۔
