اپوزیشن اتحاد پاکستان ڈیموکریٹک مومنٹ (پی ڈی ایم) کی جانب سے کل ہونے والے قومی اسمبلی کے اجلاس کے بائیکاٹ کے اعلان پر رد عمل دیتے ہوئے وفاقی وزیر برائے سائنس و ٹیکنالوجی فواد چودھری نے کہا ہے کہ سنا ہے پی ڈی ایم نے کل کے اجلاس سے دوڑ لگا دی ہے۔
سماجی رابطے کی ویب سائٹ ٹوئٹر پر اپنے پیغام میں انہوں نے کہا کہ پی ڈی ایم نے بھاگنے میں اتنی تیزی کہ جوتے بھی نہیں پہنے۔ آپ میں وزیراعظم عمران خان کے مقابلے کا حوصلہ نہیں ہے۔
سنا ہے #PDM نے کل کے اجلاس سے دوڑ لگا دی ہے، اتنی تیزی کی بھاگنے میں کہ جوتے بھی نہیں پہنے۔۔۔ حوصلہ نہیں ہے آپ میں عمران خان کے مقابلے کا
— Ch Fawad Hussain (@fawadchaudhry) March 5, 2021
خیال رہے کہ اس سے قبل پاکستان ڈیموکریٹک موومنٹ کے سربراہ مولانا فضل الرحمٰن نے کہا کہ کل ہمارا کوئی رکن قومی اسمبلی کے اجلاس میں شرکت نہیں کرے گا۔
ہم نیوز کے مطابق اپوزیشن اتحاد کے اجلاس کے بعد میڈیا بریفنگ میں مولانا فضل الرحمٰن نے ہواؤں کا رخ بدلنے کی خبر بھی دے دی۔
مولانا فضل الرحمان نے کہا کہ جب سے ہم نے احتجاج شروع کیا ہے، ہواؤں کا رخ بدلنا شروع ہوگیا ہے۔ ان کا کہنا تھا کہ ان کے ہاتھ سے سب کچھ نکل چکا ہے۔