پاکستان سپر لیگ (پی ایس ایل) 6 کے نئے ترانے ’گروو میرا‘ نے مقبولیت کے کئی ریکارڈ توڑ دیئے۔
یوٹیوب پر گزشتہ 12 روز میں ’’گروو میرا‘‘ کے ایک کروڑ کے قریب ویوز ہو چکے ہیں۔ ترانے کو 3 لاکھ سے زائد لائیکس مل چکے ہیں جب کہ ایک لاکھ 62 ہزار سے زائد لوگوں نے اسے ڈس لائیک کیا ہے۔
پی ایس ایل 5 کے ترانے ’’تیار ہیں‘‘ کو ایک لاکھ چالیس ہزار کے قریب لائیکس اور ایک لاکھ کے قریب ڈس لائیکس ملے۔
علی ظفر جنھوں نے پی ایس ایل کے پہلے تینوں ایڈیشن کے ترانے گائے تھے لائیکس کی دوڑ میں نصیبو لال سے ہار گئے۔
اب تک کے مقبول ترین ترانے ’’اب کھیل جمے گا‘‘ نے 2 لاکھ کے قریب لائکس حاصل کیے لیکن اس گانے کو صرف 8 ہزار لوگوں نے ڈس لائیکس دیے۔
لوگوں کی تنقید کے باوجود پی ایس ایل سکس کے اس گانے نے انتہائی کم وقت میں بہت زیادہ مقبولیت حاصل کی اور یوٹیوب پر سب سے زیادہ پسند کیا جانے لگا۔
یہ بھی پڑھیں: شعیب اختر کے وار بیکار، نصیبو کا 50لاکھ کا لمبا چھکا
علی ظفر، فواد خان اور علی عظمت کے مقابلے میں نصیبو لال کی آواز میں گائے گئے ترانے کو یو ٹیوب پر سب سے زیادہ لائکس اور ڈس لائیکس ملی ہیں۔
جب سے پی ایس ایل 6 کا آفیشل ترانہ ریلیز ہوا ہے اس وقت سے سوشل میڈیا پر بڑے بڑے ناقدین، سپر اسٹار اور سیاست دانوں نے اسے کڑی تنقید کا نشانہ بنایا ہوا ہے لیکن حقیقت میں یہ گانا بہت مقبول ہورہا ہے۔
پی ایس ایل اینتھم معروف پنجابی گلوکارہ نصیبو لال، آئمہ بیگ اور ہپ ہاپ بینڈ ’ینگ سٹنرز‘ نے مل کر گایا ہے جبکہ اسے زلفی اور عدنان ڈھول نے کمپوز کیا ہے۔
گانے کی ویڈیو میں قومی ٹیم کے کپتان بابراعظم، اسلام آباد یونائیٹڈ کے کپتان شاداب خان، کوئٹہ کے سرفراز احمد، لاہور قلندرز کے شاہین شاہ آفریدی، ملتان سلطانز کے شان مسعود اور پشاور زلمی کے وہاب ریاض جلوہ گر ہوئے ہیں۔
یہ بھی پڑھیں: پی ایس ایل میں تماشائیوں کو میچ دیکھنے کی اجازت مل گئی
اس ترانے میں عالمی وبا کورونا وائرس کے باعث پیدا ہونے والی صورتحال سے متعلق آگاہ کیا گیا ہے کہ جہاں اسٹیڈیم تو خالی ہیں مگر مداح اپنے گھروں میں ٹی وی اسکرینز کے سامنے بیٹھ کر میچ دیکھتے نظر آتے ہیں۔
خیال رہے کہ پی ایس ایل 6 کا آغاز 20 فروری سے ہو گا اور اس کے میچ کراچی اور لاہور میں کھیلے جائیں گے۔
پاکستان کرکٹ بورڈ نے پی ایس ایل کے میچوں کے دوران 20 فیصد شائقین کے داخلے کی اجازت دی ہے۔
کرس گیل کے علاوہ کرس لین، افغانستان کے راشد خان، مجیب الرحمان اور قیس احمد جنوبی افریقہ کے ڈیل اسٹین اور ڈیوڈ ملر بھی پہلی بار پی ایس ایل پاکستان میں کھیلیں گے۔
