اسلام آباد: ملک بھر میں آقائے دو جہاں نبی آخرالزماں حضرت محمد مصطفیٰﷺ کی ولادت با سعادت کا جشن مذہبی جوش وخروش اور عقیدت و احترام کے ساتھ منایا جا رہا ہے۔
ملک بھر میں عید میلاد النبیﷺ کی خوشی میں دن کا آغاز فجر کی نماز کے بعد دعاؤں اور درود وسلام کے ساتھ کیا گیا۔ مساجد میں ملک کی سلامتی اور مسلم امہ کے لیے خصوصی دعائیں کی گئیں۔
لاہور میں دن کے آغاز پر ایوب اسٹیڈیم کینٹ میں 21 توپوں کی سلامی دی گئی۔ جشن عید میلادالنبیﷺ کے سلسلے میں ملک کے بڑے اور چھوٹے شہروں میں ریلیوں کا اہتمام کیا جا رہا ہے جبکہ عاشقان رسولﷺ نے محافل نعت اور درودسلام کی محفلیں بھی سجا لیں۔
ملک بھر میں جید علمائے کرام جلسوں اور محافل میں خطاب کریں گے اور سیرت النبیﷺ پر روشنی ڈالیں گے۔
یہ بھی پڑھیں: اپنے پیارے نبیﷺ کی تعلیمات کی طرف رجوع کریں، نگران وزیر اعظم
جشن عید میلاالنبیﷺ کے موقع پر چھوٹے بڑے شہروں میں سیکیورٹی کے سخت انتظامات کیے گئے ہیں۔ جلوس اور ریلیوں کی سیکیورٹی کے لیے پولیس کے خصوصی دستے تعینات کیے گئے ہیں۔
عاشقان رسولﷺ اپنے اپنے انداز میں حضور پاکﷺ سے محبت کا اظہار کر رہے ہیں، کہیں برقی قمقموں سے عمارتوں کو سجایا گیا ہے تو کہیں سڑکوں پر خانہ کعبہ اور مسجد نبویﷺ کے ماڈل رکھے گئے ہیں۔ شہر شہر گلی گلی نعتیہ کلام کی گونج ہے۔
