سمندری ماہر کی جانب سے پیشگوئی کرتے ہوئے کہا گیا ہے کہ اگر لاپتہ آبدوز میں موجود سیاح زندہ رہے تو یہ ہالی ووڈ کی فلم کی طرح ہوگا۔
برطانوی چینل کے پروگرام گُڈ مارننگ برطانیہ میں بات کرتے ہوئے ایک سمندری ماہر نے کہا ہے کہ اگر لاپتہ آبدوز ٹائی ٹینک کی گہرائی تک نیچے چلی گئی ہے تو آبدوز کے ملنے کا صرف 1 فیصد امکان ہوگا۔
سمندری ماہر کا کہنا تھا کہ ‘لاپتہ آبدوز کی تلاش میں جاری آپرشین کے کامیابی کے مارجن بہت کم ہیں۔ لاپتہ آبدوز میں موجود 5 سیاحوں کے محفوظ پائے جانے کے ساتھ بچاؤ کا 1 فیصد امکان ہے۔
ٹائی ٹینک، لاپتہ آبدوز کی تلاش جاری، گمشدہ افراد میں شہزادہ داؤد اور ان کا بیٹا بھی شامل
خیال رہے کہ اتوار کے روز سیاحوں کو نیو فاؤنڈ لینڈ کے سینٹ جانز کے جنوب میں ڈوبے ہوئے ٹائٹینک جہاز کا ملبہ دکھانے کیلئے جانے والی آبدوز بحر اوقیانوس میں لاپتہ ہوگئی تھی۔ لاپتہ آبدوز کی تلاش کیلئے ایک بڑے پیمانے پر تلاش اور بچاؤ آپریشن اب تک جاری ہے۔
ریسکیو مشن کی قیادت کرنے والے ریئر ایڈمرل جان ماؤگر نے اس حوالے سے اپنے ایک بیان میں بتایا کہ ٹائی ٹینک کے ملبے کو دیکھنے کا یہ آٹھ روزہ سفر، جس کی لاگت تقریباً 228,000 یورو فی کس تھی، اتوار کی صبح 4 بجے شروع ہوا لیکن ٹائٹینک کے ملبے کے مقام تک پہنچنے میں دو گھنٹے سے بھی کم وقت میں آبدوز غائب ہو گئی تھی۔
انہوں نے کہا کہ لاپتہ جہاز کو 96 گھنٹے کی ‘ہنگامی صلاحیت’ کے ساتھ ڈیزائن کیا گیا تھا۔ یہ خدشہ بھی ظاہر کیا گیا ہے کہ ٹائٹن نامی آبدوز ٹائی ٹینک کے ملبے میں پھنسی ہوسکتی ہے۔
