کراچی: سابق صدر آصف علی زرداری نے کہا ہے کہ پیپلز پارٹی ہی قوم کو معاشی بدحالی سے نجات دلائے گی۔
سابق صدر اور پیپلز پارٹی کے شریک چیئرمین آصف علی زرداری نے بینظیر بھٹو کی سالگرہ کے موقع پر اپنے پیغام میں کہا کہ پیپلز پارٹی بینظیر بھٹو شہید کے فلسفے پر ثابت قدمی کے ساتھ عمل پیرا ہے اور ہم بینظیر بھٹو کے خوابوں کی تعبیر کریں گے۔
انہوں نے کہا کہ بینظیر بھٹو کی سیاست کا مقصد ملک سے جہالت کے اندھیروں کا خاتمہ تھا اور ایسا پاکستان ہو جہاں عوام کو سماجی اور معاشی انصاف میسر ہو، ایسا معاشرہ جو ہر طرح کی شدت پسندی اور دہشت سے پاک ہو۔
یہ بھی پڑھیں: سائیکل چلانے والے کو جہاز دے دیا گیا، فیصل واوڈا
آصف علی زرداری نے کہا کہ پاکستان پیپلز پارٹی عوام کو غربت، مفلسی اور معاشی بدحالی سے ضرور نجات دلوائے گی۔
انہوں نے کہا کہ بطور وزیر خارجہ بلاول بھٹو نے ملک کی کھوئی ہوئی ساکھ بحال کر دی ہے اور چیئرمین بلاول بھٹو زرداری کا اگلا قدم بینظیر بھٹو شہید کا پاکستان بنانا ہے۔
