سابق وزیر خزانہ مفتاح اسماعیل نے کہا ہے کہ حکومت کیلئے 21 ارب روپے فراہم کرنا کوئی مسئلہ نہیں تھا۔
نجی ٹی وی چینل سے گفتگو کرتے ہوئے انہوں نے پنجاب انتخابات کے حوالے سے سپریم کورٹ کے فیصلے پر اظہار خیال کیا۔ انہوں نے کہا کہ مجھے لگتا ہے اسٹیٹ بینک پنجاب الیکشن کے لیے فنڈز جاری نہیں کرے گا۔
مسلم لیگ (ن) کے رہنما کا کہنا تھا کہ سپریم کورٹ کا براہ راست اسٹیٹ بینک کو فنڈز جاری کرنے کا حکم اپنے دائرہ اختیار سے تجاوز ہے۔ وزارت خزانہ اور آڈیٹر جنرل بھی وفاقی کابینہ کی منظوری کے بغیر پیسے نہیں نکلوا سکتے، اس حکم پر عمل نہیں ہوگا۔
انہوں نے مزید کہا کہ 21 ارب روپے فراہم کرنا حکومت کیلئے کوئی مسئلہ نہیں تھا، اس کیلئے پارلیمنٹ کی منظوری کی بھی ضرورت نہیں ہے۔
خیال رہے کہ وزارت خزانہ کی جانب سے پنجاب کے انتخابات کے لیے فنڈز کی فراہمی سے معذرت کرلی گئی تھی۔ وزیر مملکت برائے خزانہ عائشہ غوث نے کہا تھا کہ ملک کی مکمل مالی صورت حال آپ کے سامنے رکھ دی ہے۔ ہم آئی ایم ایف پروگرام میں ہیں مالی خسارہ ہدف میں رکھنے کے پابند ہیں۔
