اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) نے موسمی حالات کے باعث متعلقہ اداروں کو الرٹ جاری کر دیا۔
ملک بھر میں بارشوں کا نیا سلسلہ شروع ہونے کی پیشگوئی کرتے ہوئے این ڈی ایم اے نے متعلقہ اداروں اور شراکت داروں کے لیے الرٹ جاری کیا ہے۔
محکمہ موسمیات نے ملک کے بالائی علاقوں اور وسطی علاقوں میں 15 اپریل سے بارشوں کے نئے سلسلے کی پیشگوئی کر رکھی ہے اور یہ سلسلہ 20 اپریل تک جاری رہے گا۔
این ڈی ایم اے نے متعلقہ اداروں کو ہدایت جاری کی ہے کہ ممکنہ بارشوں کی پیشگوئی پر ہائی الرٹ رہیں جبکہ متاثرہ علاقوں میں آندھی اور ژالہ باری کے باعث کھڑی فصلوں کو نقصان پہنچنے کا خدشہ ہے۔
یہ بھی پڑھیں: 2023 دنیا کا گرم ترین سال ہونے کی پیشگوئی
این ڈی ایم اے کے مطابق چترال، دیر، سوات، کوہستان، گلگت بلتستان، کشمیر، مری اور گلیات میں لینڈ سلائیڈنگ اور فلڈنگ کا بھی خدشہ ہے۔ ممکنہ صورتحال کے باعث تمام اداروں کو مربوط انداز میں کام کرنے کی ضرورت ہے۔
نیشنل ڈیزاسٹر مینجمنٹ اتھارٹی نے سیاحوں اور آبادیوں کی معلومات کے لیے پیشگی ضروری اطلاعات اور انتباہات جاری کرنے کی ہدایت کر دی۔
