سیشن کورٹ اسلام آباد نے خاتون جج دھمکی کیس کا تحریری حکم نامہ جاری کر دیا ہے۔
ایڈیشنل سیشن جج سکندر خان نے دو صفحات پر مشتمل تحریری فیصلے میں عمران خان کے ناقابل ضمانت وارنٹ گرفتاری کالعدم قرار دینے کا حکم دیا ہے۔
فیصلے میں کہا گیا کہ عمران خان کے ناقابل ضمانت وارنٹ گرفتاری کالعدم قرار دیے جاتے ہیں، ٹرائل کورٹ عمران خان کے قابل ضمانت وارنٹ جاری کرے۔
عمران خان کی حاضری سے استثنیٰ کی درخواست مسترد کرنے کا فیصلہ برقرار رکھا گیا، تحریری حکم نامے میں کہا گیا کہ تفتیشی افسر نے بتایا کہ عمران خان کی رہائش گاہ پر وارنٹ کی تعمیل نہیں کی گئی۔
تحریری فیصلے میں کہا گیا کہ سیشن عدالت کا قابل ضمانت وارنٹ جاری کرنے کا فیصلہ برقرار ہے اورٹرائل کورٹ کو سیشن عدالت کا فیصلہ نظرانداز نہیں کرنا چاہئے تھا، عدالت نے عمران خان کے قابل ضمانت وارنٹ گرفتاری جاری کرنے کا حکم دیا۔
