سابق کرکٹر شعیب اختر اور اینکرنعمان نیاز کی صلح ہوگئی، وفاقی وزیراطلاعات فواد چودھری نے دونوں کو کھانے پر بلایا اور پھر سے دوستی کرا دی۔
پاکستان ٹیلی ویژن کے اینکر نعمان نیاز نے شعیب اختر سے لائیو پروگرام میں بدتمیزی کی تھی جس پر انہیں آف ایئر کر دیا گیا تھا۔
معاملے پر کمیٹی بنی اور انکوائریاں ہونے لگیں، ایسے میں وفاقی وزیراطلاعات فواد چودھری آگے بڑھے اور دونوں کو کھانے پر مدعو کرلیا۔
نعمان نیاز نے غیر مشروط معافی مانگ لی اور کہا کہ ان کی 30سال کی دوستی ہے جوختم نہیں ہونی چاہیے،اسکرین پر جوہوا اس پرافسوس ہے ۔
شعیب اختر نے معاف کیا،گلے لگایا اور پھر سے دونوں ایک ہو گئےاور خوش گپیاں لگانے لگے ۔
وفاقی وزیراطلاعات فواد چودھری نے ٹوئٹر پر شعیب اختر اور نعمان نیاز کے ساتھ ایک تصویر بھی شیئر کی اور لکھا۔
دوست دو چار نکلتے ہیں کہیں لاکھوں میں
جتنے ہوتے ہیں سوا اتنے ہی کم ہوتے ہیں۔۔۔۔۔۔۔۔ بات اتنی نہیں تھی کہ اس پر اتنی گفتگو ہوتی لیکن کیا ہے کہ سوشل میڈیا اب اتنا بڑا ہے کہ چھوٹی باتیں بھی بڑی ہو جاتی ہیں، بہرحال All is well that ends well #GameOnHai #PTV pic.twitter.com/TLsGjfUw13
— Ch Fawad Hussain (@fawadchaudhry) November 13, 2021
خیال رہے کہ ٹی ٹوئنٹی ورلڈ کپ کے لائیو شو میں پاکستان کے فاسٹ بالر شعیب اختر اور میزبان ڈاکٹر نعمان نیاز میں جھگڑا ہوگیا تھا اور شعیب اختر اٹھ کر چلے گئے تھے۔
یہ بھی پڑھیں:شعیب اختر سے بدتمیزی، اداکار بھی قومی ہیرو کے حق میں بول پڑے
ورلڈ کپ میں نیوزی لینڈ سے میچ جیتنے کے بعد شعیب اختر نے لائیو شو میں باولر حارث روف کی کارکردگی کی خوب تعریف کی اور اپنے مخصوص انداز میں مذاق بھی کرتے رہے۔
میزبان ڈاکٹر نعمان نیاز کو ان کی بات پسند نہ آئی جس پر انہوں نے لیجنڈ پلیئر شعیب اختر کو بد تمیز کہہ کر پروگروام چھوڑنے کا کہہ دیا۔ شعیب اختر نعمان نیاز کے رویے پر ناراض ہو گئے۔
شعیب اختر اور ڈاکٹر نعمان نیاز میں تلخ کلامی کے وقت ویون رچرڈز ،ڈیوڈگاور،عمر گل،راشد لطیف،اظہر محمود اور ثنا میر بھی موجود تھے۔
شو کے میزبان نے اس وقت بریک لے لی۔ بریک کے بعد شعیب اختر واپس شومیں موجود تھے اور دونوں نے اس واقعہ کو مذاق قرار دیا۔ لیکن شعیب اختر نے بعد میں لائیو شو کے دوران ہی استعفیٰ دے دیا اور اٹھ کر چلے گئے۔
یہ بھی پڑھیں:پی ٹی وی نے بھیجا ہرجانے کا نوٹس: شعیب اختر برہم ، عدالت جانیکا اعلان
شعیب اختر اور نعمان نیاز کی ناراضی کے ویڈیو کلپ پر سوشل میڈیا صارفین نے حیرانی اور ناپسندیدگی کا اظہار کیا تھا۔ سوشل میڈیا صارفین نے کہا کہ لائیو شو میں لیجنڈ پلیئرز یا کسی بھی مہمان کے ساتھ ایسا رویہ نا مناسب ہے۔
سوشل میڈیا پر کلپ وائرل ہونے کے بعد شعیب اختر نے بھی لائیو شو کے واقعہ پر اپنا ردعمل دیتے ہوئے کہا کہ انہیں لائیو شو میں چلے جانے کو کہہ دیا گیا۔انہیں سمجھ نہیں آیا کہ ڈاکٹر نعمان نیاز نے ایسا کیوں کہا۔
انہوں نے کہا ہے کہ ٹی وی پر ایک اسٹار کی یوں توہین مناسب نہیں،غیر ملکی اور قومی اسٹارز کیا سوچیں گے کہ یہ کیا ہو رہا ہے۔میں نے بات سنبھالنے کی کوشش کی لیکن ڈاکٹر نعمان نیاز نے ان سے معافی نہیں مانگی، اور کوئی چارہ نہیں تھا، اس لیے انہوں نے استعفیٰ دے دیا۔
