خیبرپختونخوا میں کورونا وائرس کی تیسری لہر کے پیش نظر پشاور کے اسکولوں کو بند رکھنے کا نوٹیفکیشن جاری کر دیا گیا
جاری نوٹیفکیشن کے مطابق سرکاری اور پرائیویٹ پرائمری ، مڈل اور ہائی اسکول 15 مارچ سے 28 مارچ تک بند رہیں گے ۔
جاری نوٹیفکیشن کے مطابق صرف اسکولوں کے انتظامی عملے کو ایس او پیز کے ساتھ طے شدہ شیڈول پر ڈیوٹی کرنے کی اجازت ہو گی۔
خیال رہے کہ گزشتہ روز نیشنل کمانڈ ایند کنٹرول سنٹر (این سی او سی) کے اجلاس میں کورونا کیسز میں اضافے کے پیش نظر اسلام آباد، پشاور اور پنجاب کے7 شہروں میں تمام تعلیمی ادارے اگلے ہفتے سے 15 دن کیلئے بند کرنے کا فیصلہ کیا گیا۔
این سی او سی اجلاس کے بعد وفاقی وزیرتعلیم شفقت محمود کے ہمراہ پریس کانفرنس کرتے ہوئے وزیراعظم کے معاون خصوصی برائے صحت فیصل سلطان نے کہا تھا کہ اسلام آباد، فیصل آباد، لاہور، گجرات، ملتان، راولپنڈی، سیالکوٹ اور لاہورمیں تعلیمی ادارے 15 سے 28مارچ تک بند رہیں گے۔
معاون خصوصی برائے صحت فیصل سلطان نے کہا تھا کہ تقریحی پارک شام 6 بجے بند کرنے کا فیصلہ کیا گیا۔ اجلاس میں بتایا گیا کہ سندھ اور بلوچستان میں کوروناکیسزکی شرح کم ہے اور ان صوبوں میں50فیصد طلبہ تعلیمی اداروں میں حاضری دیتے رہیں گے۔
کورونا: اسلام آباد کے 3 تعلیمی ادارے بند کرنے کا فیصلہ
انہوں نے کہا تھا کہ اسلام آباد میں دفاتر میں 50 فیصد حاضری پر کل سے عملدرآمد ہوجائے گا۔ شادی ہالز اورریسٹورنٹس میں انڈورسروسزبدستور بندرہیں گی۔
این او سی کے اجلاس میں 15 مارچ سے شادی ہالز وغیرہ کھولنے کا فیصلہ موخر کردیا گیا ہے۔ این سی اوسی کی شادی ہال سے متعلق پالیسی برقرار رہے گی
وفاقی وزیر شفقت محمود نے اس ضمن میں کہا تھا کہ کورونا کیسز میں اضافہ دیکھنے میں آرہا ہے۔
انہوں نے کہا تھا کہ اگلے ہفتے سے اسلام آباد، فیصل آباد، لاہور، گجرات، گوجرانوالہ، ملتان، راولپنڈی، سیالکوٹ اور لاہور میں تعلیمی ادارے بند رہیں گے جبکہ خیبرپختونخوا میں اس فیصلے کا اطلاق صرف پشاور پر ہوگا۔ سندھ اور بلوچستان میں 50 فیصد طلبہ تعلیمی اداروں میں حاضری دیتے رہیں گے۔
وفاقی وزیرتعلیم شفقت محمود کا کہنا تھا کہ ابھی صورتحال نومبر اور دسمبر 2020 والی نہیں ہے تاہم انہوں نے اعتراف کیا ہے کہ کورونا کیسز کی شرح میں گزشتہ ایک ہفتے کے دوران اضافہ ہوا ہے۔
