اسلام آباد: مینز کرکٹ ورلڈ کپ 2023 میں براہ راست کوالیفائی کرنے کی دوڑ 30 جولائی سے شروع ہو جائے گی.
انٹرنیشنل کرکٹ کونسل (آئی سی سی) نے مینز کرکٹ ورلڈ کپ دو سپر لیگ کا افتتاح کر دیا ہے۔ ورلڈ کپ سپر لیگ میں بارہ فل ممبرز کے ساتھ نیدر لینڈز کرکٹ ٹیم بھی شرکت کرے گی۔
آئی سی سی کے مطابق ہر ٹیم کو چار ہوم اور چار آوے تین میچوں کی ون ڈے سیریز کھیلنا ہوں گی۔ ٹاپ سات ٹیمیں میگا ایونٹ میں براہ راست رسائی حاصل کریں گی۔
آئی سی سی کے مطابق ایونٹ کا آغاز تیس جولائی کو انگلینڈ اور آئر لینڈ کے درمیان سیریز کے پہلے میچ سے ہو گا۔
خیال رہے کہ 9 جولائی کو کورونا وبا کی وجہ سے ایشیا کرکٹ کپ ملتوی کردیا گیا تھا۔ جون 2021 میں ہونے والے ایشیاکپ کی میزبانی سری لنکا کرے گا۔
مزید پڑھیں: دورہ انگلینڈ : پی سی بی کا قومی کرکٹ ٹیم کا تربیتی کیمپ نہ لگانے کا فیصلہ
ایشین کرکٹ کونسل کا کہنا تھا کہ کوروناوبا کی وجہ سےایشیاکرکٹ کپ ملتوی کرناپڑا۔ ایشیاکپ کو جون 2021 میں منعقد کرنے کی کوشش کی جائے گی۔
ایشین کرکٹ کونسل نے اعلامیہ میں کہا تھا کہ جون 2021 میں ہونے والے ایشیاکپ کی میزبانی پاکستان کے بجائے سری لنکا کرے گا۔
ایشین کرکٹ کونسل کا کہنا تھا کہ پاکستان کرکٹ بورڈایشیا کپ 2022 کی میزبانی کرے گا۔ پی سی بی نے ایشیاکپ کی میزبانی کے حقوق سری لنکا کو دیے ہیں۔
خیال رہے کہ اس سے قبل ایشیا کپ 2020 کی میزبانی کے سلسلے میں پاکستان کرکٹ بورڈ (پی سی بی) نے سری لنکا کو مشروط پیشکش کر دی تھی۔
ذرائع کے مطابق کورونا وائرس وبا کے باعث پی سی بی نے رواں برس سری لنکن بورڈ کو ایشیا کپ کی میزبانی دینے کی مشروط پیشکش کی تھی۔
ذرائع نے ہم نیوز کو بتایا تھا کہ پی سی بی اس برس میزبانی کے تبادلے کیلئے رضا مند ہے، اس مرتبہ سری لنکا ایونٹ کی میزبانی کر سکتا ہے جبکہ پاکستان اگلے ایشیا کپ کی میزبانی کر سکتا ہے جوکہ 2022 میں ہو گا۔
