اسلام آباد، راولپنڈی، لاہور سمیت ملک کے مختلف شہروں میں طوفانی بارش سے موسم خوشگوار ہوگیا، نشیبی علاقے زیرِ آب آگئے۔
اسلام آباد اور گردونواح میں منگل کی صبح گرج چمک کے ساتھ بارش ہوئی جس سے گرمی کی شدت میں کمی آگئی۔ راولپنڈی میں بھی موسلادھار بارش ہوئی جس سے نشیبی علاقے زیر آب آگئے۔
طوفانی بارشوں کے باعث سی اے اے نے کراچی ایئرپورٹ کیلئے الرٹ جاری کردیا
راولپنڈی میں طوفانی بارش کے باعث پانی گھروں اور گلیوں میں داخل ہوگیا۔ سٹی سرکل، کینٹ، ڈھوک کالا خان، کُری روڈ، شکریال، آفندی کالونی اور کھنہ پل میں پانی گلیوں میں داخل ہوگیا۔
لاہور میں بھی بادل جم کر برسے، مال روڈ، انار کلی بازار، اعوان ٹاؤن، قرطبہ چوک،وارث روڈ، لارنس روڈ، ریاض کالونی، مزنگ، شمع اسٹاپ کے اطراف بارش ہوئی۔ جڑانوالہ، ننکانہ صاحب ،کامونکی ،دینہ،کھاریاں اور لالہ موسیٰ، فیروزوالہ، مانانوالہ میں بھی بادل خوش برسے۔
دوسری طرف محکمہ موسمیات کی جانب سے کراچی، ٹھٹہ، بدین اور سجاول سمیت سندھ کے مختلف علاقوں میں بھی بارش کا امکان ظاہر کیا گیا ہے۔ کراچی کے مختلف علاقوں میں پیر کی رات بھی ہلکی بارش ہوئی تھی۔
پنجاب میں مون سون بارشوں کا چوتھا سپیل 22 جولائی سے شروع ہو گا،پی ڈی ایم اے
اسی طرح مری، گلیات، مانسہرہ، کوہستان، مالاکنڈ، دیر، سوات، شانگلہ، بونیر، کرم، اورکزئی، خیبر، مہمند، نوشہرہ، صوابی میں بارش متوقع ہے۔ کوئٹہ، زیارت، لسبیلہ، آواران، خضدار، پنجگور اوربارکھان میں بادل برسنے کا امکان ہے۔
بالائی علاقوں کی بات کی جائے تو ناران میں جھیل سیف الملوک روڈ پر برفانی تودہ گرنے سے 2 سیاح جاں بحق ہوگئے۔ آزاد کشمیر اور گلگت بلتستان میں بھی لینڈ سلائیڈنگ کا خدشہ ظاہر کیا گیا ہے۔
