لاہور: انٹرنیشنل کرکٹ کونسل (آئی سی سی) نے پاکستان کو انٹرنیشنل ٹورنامنٹس کے لیے پرامن ملک قرار دے دیا۔
انٹرنیشنل کرکٹ کونسل کے اعلیٰ عہدیداروں نے پاکستان میں ایشیا کپ اور چیمپئینز ٹرافی 2025 کے انعقاد کے لیے سیکیورٹی اور انتظامات کا جائزہ لیا۔
چیئرمین آئی سی سی گریگ بارکلے اور چیف ایگزیکٹو جیف ایلر ڈائس نے سیف سٹیز اتھارٹی کا دورہ کیا اور کیمروں سے سرویلنس کا معائنہ کیا۔
اس موقع پر پاکستان کرکٹ بورڈ (پی سی بی) کے مینجنگ ڈائریکٹر محمد کامران خان نے ایشیا کپ کے لیے سیکیورٹی انتظامات کے حوالے سے بریفنگ دی۔
پی سی بی حکام کی جانب سے آئی سی سی وفد کو پاکستان دورہ کرنے والی ٹیموں کو دی جانے والی سیکیورٹی کی ویڈیوز دکھائیں اور ائیرپورٹ، اسٹیڈیم روٹس، ہوٹلز، پارکنگ اور پولیس فورس کے انتظامات کے حوالے سے بھی بریفنگ دی۔
یہ بھی پڑھیں: پاکستان جونئیر ہاکی ایشیا کپ کے فائنل میں پہنچ گیا
آئی سی سی وفد کو جدید ٹیکنالوجی کے استعمال و قانون نافذ کرنے والے اداروں کے باہمی اشتراک سے متعلق آگاہ کیا۔ چیئرمین آئی سی سی گریگ بارکلے نے شہر بھر میں نصب کیمروں سے روٹس کو مانیٹر کیا اور سیکیورٹی پر اطمینان کا اظہار کیا۔
چیئرمین آئی سی سی نے کہا کہ سیف سٹی لاہور کا انفراسٹرکچر دنیا کے بہترین سسٹمز میں سے ہے جبکہ پاکستان انٹرنیشنل سیریز اور ٹورنامنٹ کے لیے پرامن ملک ہے اور امید کرتے ہیں مستقبل میں پاکستان بڑے ٹورنامنٹس کی میزبانی کرے گا۔
