ٹوکیو: جاپان میں دوران ملازمت سگریٹ نوشی کی وجہ سے ملازم پر ہزاروں ڈالر جرمانہ عائد کر دیا گیا۔
غیر ملکی خبر رساں ایجنسی کے مطابق جاپان کے شہر اوساکا میں سگریٹ نوشی پر کام کے دوران مکمل پابندی عائد ہے اور اگر کوئی ملازم سگریٹ نوشی کا مرتکب ہوا تو اس کی تنخواہ سے بھاری کٹوتی کر دی جاتی ہے۔
اوساکا میں دوران ملازمت سگریٹ نوشی پر ڈائریکٹر سطح کے 61 سالہ ملازم کو 11 ہزار امریکی ڈالر کی تنخواہ بطور جرمانہ واپس کرنا پڑ گئی کیونکہ وہ 14 سال سے ڈیوٹی کے دوران 4 ہزار 500 مرتبہ سگریٹ نوشی کا مرتکب ہوا تھا۔
یہ بھی پڑھیں: ہینڈ بیگ کی قیمت سوا کروڑ روپے
اوساکا پرفیکچرل گورنمنٹ کی جانب سے مذکورہ ملازم سمیت 2 افراد کے خلاف تحقیقات 2022 میں شروع کی گئی تھیں جن کے خلاف ادارے کو ایک گمنام درخواست موصول ہوئی تھی۔
واضح رہے کہ اوساکا کے سرکاری مقامات، اسکولز اور دفاتر میں سگریٹ نوشی پر مکمل پابندی عائد ہے اور اس پابندی کو تقریبا 20 برس کا عرصہ گزر چکا ہے۔
