اسلام آباد: وزیر اعظم شہباز شریف نے کہا ہے کہ حکومتی سطح پر کفایت شعاری کی پالیسی اپنائی جا رہی ہے جس کا اعلان جلد کیا جائے گا۔
وزیر اعظم شہباز شریف کی زیر صدارت وفاقی کابینہ کا اجلاس ہوا۔ جس کے جاری کردہ اعلامیہ کے مطابق وفاقی کابینہ نے ٹیکس بلز 2023 کی منظوری دے دی اور منی بجٹ 2023 آج قومی اسمبلی میں پیش کیا جائے گا۔
وزیر اعظم شہباز شریف نے کہا کہ حکومتی سطح پر کفایت شعاری کی پالیسی اپنائی جا رہی ہے اور جس کا اعلان جلد کیا جائے گا۔ ذرائع آمدنی کے اندر رہتے ہوئے ہم معاشی مشکلات پر قابو پاسکیں گے۔
یہ بھی پڑھیں: الیکشن کی تاریخ دیکر آئین سے انحراف ختم کیا جائے، انحراف کی سزا آرٹیکل 6 کے تحت ہوتی ہے، اسد عمر
انہوں نے کہا کہ گزشتہ حکومت کی نااہلی کا خمیازہ اس وقت 22 کروڑ عوام بھگت رہی ہے جبکہ مشکل حالات میں اقتدار سنبھالا اور ریاست کو بچانے کے لیے اپنی سیاست کی قربانی دی۔
شہباز شریف نے کہا کہ سادگی اور کفایت شعاری کے نام پر گزشتہ حکومت نے عوام کو دھوکے میں رکھا۔
اعلامیہ کے مطابق عالمی مالیاتی ادارے (آئی ایم ایف) کے نویں جائزے کے تناظر میں کی جانے والی اصلاحات کے حوالے سے کابینہ کو بریفنگ دی گئی اور اصلاحات کے نتیجے میں لگژری آئٹمز پر اضافی ٹیکسز عائد کیے جا رہے ہیں۔
جنرل سیلز ٹیکس میں صرف ایک فیصد اضافہ کیا جائے گا۔ ترکیہ زلزلہ متاثرین فنڈ کا نام ترکیہ اور شام زلزلہ متاثرین فنڈ رکھنے کی منظوری دی گئی۔
