اسلام آباد: تربیلا ہائیڈرو پاور کے چوتھے توسیعی منصوبے نے آج ایک اور اہم کامیابی حاصل کرلی ہے، منصوبے نے آج نیشنل گرڈ کو اپنی پیداواری صلاحیت کے مطابق ایک ہزار 410میگاواٹ بجلی مہیا کی۔
ترجمان واپڈا کی طرف سے جاری بیان میں کہا گیاہے کہ تربیلا چوتھے توسیعی منصوبے سے بجلی کی پیداوار پاور پلانٹ کے اعلیٰ معیار اور ڈیم میں پانی کی بلند سطح کے باعث حاصل ہوئی ہے۔
واپڈا کی ترجمان نے ذرائع ابلاغ کے نمائندوں کو جاری بیان میں کہاہے کہ اہم کامیابی کے حصول پر چیئرمین واپڈا نے تربیلا چوتھے توسیعی منصوبے کی انتظامیہ خصوصاً انجینئرز کو مبارکباد دینے کے ساتھ ساتھ پوری قوم کو مبارکباد کا پیغام دیاہے۔
یاد رہے کہ رواں سال 11 جون کو خبر آئی تھی کہ تربیلا کے چوتھے توسیعی منصوبہ نے بجلی کی پیداوار شروع کر دی ہے جبکہ اس کے دوسرے یونٹ کی ویٹ کمیشننگ بھی شروع کی جا چکی ہے اور اس یونٹ سے بھی جلد بجلی پیدا ہونا شروع ہو جائے گی۔
ترجمان واپڈا کے مطابق منصوبے کا پہلا یونٹ نیشنل گرڈ کو اوسطاً 335 میگاواٹ بجلی مہیا کر رہا ہے تاہم یونٹ کو بتدریج اس کی پوری پیداواری صلاحیت یعنی 470 میگاواٹ تک لے جایا جائے گا جس کے لیے کام جاری ہے اور اسے جلد مکمل کر لیا جائے گا۔
انہوں نے بتایا کہ منصوبے کا پہلا یونٹ وقت پر بجلی کی پیداوار شروع نہیں کرسکا تھا جس کی وجہ پانی کی کمی تھی، یہ یونٹ اپریل میں مکمل ہوا تھا تاہم اب یہ 335 میگاواٹ بجلی فراہم کر رہا ہے۔
ان کا کہنا تھا کہ تربیلا چوتھے توسیعی منصوبے سے بجلی کی پیداوار شروع ہونے سے بجلی کے بحران پر قابو پانے میں مدد ملے گی۔
یہ بھی پڑھیے: تربیلا چوتھے توسیعی منصوبے سے بجلی کی پیداوار شروع
