نجران میں خطرہ ٹل گیا، سعودی سول ڈیفنس کا الرٹ واپس لینے کا اعلان

سعودی عرب کی سول ڈیفنس نے جنوبی صوبے نجران میں ممکنہ خطرے کے حوالے سے جاری کردہ الرٹ کے بعد خطرہ ٹل جانے کا اعلان کر دیا۔

ترک نیوز ایجنسی انادولو کے مطابق سعودی سول ڈیفنس نے کہا ہے کہ نجران میں خطرہ اب ختم ہو گیا ہے، شہری اپنی حفاظت کیلئے حکومتی ہدایت پر عمل کریں اور کسی بھی صورت اجتماع یا خطرے کی جگہ کی ویڈیو بنانے سے گریز کریں۔

اس سے قبل نجران میں قومی ہنگامی ابتدائی انتباہی پلیٹ فارم کے ذریعے شہریوں کو ممکنہ خطرے سے آگاہ کیا گیا تھا اور محفوظ مقامات پر رہنے کی ہدایت کی گئی تھی۔

یہ صورتحال سعودی مملکت اور یمن کے حوثیوں کے درمیان جاری کشیدگی کے تناظر میں پیش آئی ہے۔ حوثیوں نے سعودی بحری جہازوں کے خلاف بحیرہ احمر میں سمندری ناکا بندی کا اعلان کرتے ہوئے سعودی سرزمین پر میزائل اور ڈرون حملے بھی کیے ہیں۔

سول ڈیفنس نے ہنگامی صورتِ حال کے دوران پرسکون رہنے اور عمارت کے اندر محفوظ مقام یا کھڑکیوں سے دور کسی اندرونی کمرے میں منتقل ہونے کی ہدایت کی تھی، خطرہ ختم ہونے کی تصدیق تک محفوظ مقام سے باہر نہ نکلنے پر بھی زور دیا گیا تھا۔

تنبيه زال الخطر عن منطقة نجران، لسلامتك الاستمرار في اتباع تعليمات #الدفاع_المدني وتجنب التجمهر والتصوير نهائيًا. في حالة الطوارئ اتصل بالرقم (998).

Alert: The danger has passed in Najran Province. For your safety, continue following #CivilDefense instructions and avoid gathering and filming. In case of emergency, call (998).

— الدفاع المدني السعودي (@SaudiDCD) September 22, 2026

شہریوں کو کھلے مقامات، شیشوں، بالکونیوں اور چھتوں سے دور رہنے جبکہ باہر موجود افراد کو قریبی عمارت میں پناہ لینے یا کسی مضبوط رکاوٹ کے پیچھے محفوظ ہونے کی ہدایت کی گئی تھی۔

اس کے علاوہ سڑکوں پر موجود ڈرائیورز سے انتباہ موصول ہونے کی صورت میں پلوں اور بلند عمارتوں سے دور سڑک کے کنارے گاڑی روکنے کا بھی کہا گیا تھا۔