ڈھاکہ: بنگلہ دیش کی مستعفی وزیر اعظم شیخ حسینہ واجد کے بیٹے اور مشیر انفارمیشن اینڈ کمیونیکیشن صجیب واجد نے کہا ہے کہ والدہ اب کبھی سیاست میں واپس نہیں آئیں گی۔ میری والدہ نے بنگلہ دیش صرف اور صرف اہلخانہ کی ضد پر چھوڑا۔
بنگلہ دیش کی سابق وزیر اعظم شیخ حسینہ واجد کے صاحبزادے صجیب واجد نے میڈیا سے گفتگو کرتے ہوئے کہا کہ میری والدہ نے بنگلہ دیش کی تعمیر اور ترقی کے لیے بے پناہ محنت کی ہے۔ ہمارے لیے ان کی حکومت کا یوں چلے جانا ایک دھچکا ہے۔
انہوں نے کہا کہ میری والدہ نے بنگلہ دیش صرف اور صرف اہلخانہ کی ضد پر چھوڑا کیونکہ ہمیں ان کی زندگی خطرے میں نظر آرہی تھی۔ ہمارے دباؤ پر وہ ملک سے نکلیں۔
یہ بھی پڑھیں: شیخ حسینہ واجد کی حکومت کا خاتمہ ، مودی سرکار نے سر جوڑ لئے
صجیب واجد نے کہا کہ حکومت کا یوں چلے جانا ہمارے لیے ایک دھچکا ہے کیوں کہ میری والدہ نے ملک اور قوم کے لیے دن رات محنت کی۔ انہوں نے معیشت کو مضبوط کیا جس کا اعتراف عالمی سطح پر کیا جاتا ہے۔
شیخ حسینہ واجد کے بیٹے نے اپنی والدہ کے سیاسی مستقبل کے بارے میں کہا کہ ان کی والدہ اب کبھی سیاست میں واپس نہیں آئیں گی۔ مظاہرین کے خلاف حکومت کا ردعمل بالکل درست تھا۔
