وزیراعظم آج صدر رئیسی کی نمازِ جنازہ میں شرکت، آیت اللہ خامنہ ای سے ملاقات کریں گے

صدر رئیسی

وزیراعظم شہباز شریف ایرانی صدر رئیسی کی نماز جنازہ میں شرکت کرنے کے لیے آج تہران جائیں گے، سپریم لیڈر آیت اللہ خامنہ ای سے بھی ملاقات کریں گے۔

وزیراعظم کے دفتر سے جاری بیان میں کہا گیا ہے کہ وزیراعظم کے دورہ ایران میں انکے ہمراہ نائب وزیراعظم اسحاق ڈار اور دیگر وزراء بھی شامل ہوں گے۔ وزیراعظم ایرانی صدر رئیسی اور دیگر کی نمازِ جنازہ میں شرکت کریں گے۔

ایرانی صدر ابراہیم رئیسی کو اسلامی دنیا کا ہیرو مانتا ہوں، گورنر سندھ

شہباز شریف پاکستان کے عوام اور حکومت کی جانب سے ہیلی کاپٹر حادثے میں جاں بحق ہونے والے ایرانی صدر ابراہیم رئیسی، وزیرخارجہ حسین امیر عبداللہیان اور دیگر ساتھیوں کی موت پر تعزیت کا اظہار کریں گے۔

اس موقع پر وزیراعظم شہباز شریف سپریم لیڈر آیت اللہ امام خامنہ ای اور ایران کے قائم مقام صدر ڈاکٹر محمد مخبر سے بھی ملاقات کریں گے۔

خیال رہے کہ ایرانی صدر ابراہیم رئیسی کی آخری رسومات آج تہران میں ادا کی جائیں گی جس میں کئی ممالک سے وفود شرکت کریں گے۔ تہران میں ایران کے سپریم لیڈر آیت اللہ خامنہ ای ایرانی صدر، وزیر خارجہ اور دیگر کی نماز جنازہ پڑھائیں گے۔

ایرانی صدر کے ہیلی کاپٹر میں سگنلز بھیجنے والا آلہ بند ہونے کا انکشاف

ابراہیم رئیسی کو کل بروز جمعرات انکے آبائی شہر مشہد میں سپرد خاک کیا جائے گا۔

اس سے قبل گزشتہ روز ایران کے شہر قم میں بھی ایرانی صدر ابراہیم رئیسی اور ان کے ساتھیوں کی نماز جنازہ ادا کی گئی تھی جس میں ایرانی شہریوں کی بڑی تعداد نے شرکت کی تھی۔


متعلقہ خبریں