غزہ: فلسطین کی مزاحمتی تحریک حماس نے دنیا بھر کے مسلمانوں سے جمعہ کو “یوم طوفان اقصیٰ” منانے کی اپیل کر دی۔
غیر ملکی خبر رساں ایجنسی کے مطابق حماس نے اسرائیل کے خلاف جنگ میں اسرائیل کے بڑے نقصان اور کامیاب آپریشن پر “یوم طوفان اقصیٰ” منانے کا اعلان کیا اور دنیا بھر کے مسلمانوں سے اپیل کی کہ اسرائیلی جارحیت کے خلاف یکجہتی کے لیے میدان میں نکلیں۔
حماس نے مطالبہ کیا کہ دنیا بھر کے مسلمان نماز جمعہ کے بعد اللہ کے شکر گزار ہوں اور اسرائیلی جارحیت کے خلاف احتجاج کریں تاکہ عالمی دنیا قابض اسرائیلی فوج کے مظالم سے آگاہ ہو۔
حماس نے مقبوضہ بیت المقدس کے فلسطینیوں سے اپیل کی کہ وہ گھروں سے باہر نکلیں اور اسرائیل کے ناجائز قبضے کے خلاف مزاحمت کریں۔ قابض فوج کو اپنی سرزمین سے نکال باہر کریں۔
یہ بھی پڑھیں: اسرائیلی بمباری، فلسطینی شہدا کی تعداد 900 سے بڑھ گئی
واضح رہے کہ حماس نے اسرائیل کے خلاف بھرپور کارروائی کے آپریشن کو طوفان اقصیٰ کا نام دیا تھا جس میں 900 سے زائد افراد مارے گئے۔ جن میں 11 امریکی سمیت دیگر غیر ممالک کے شہری بھی شامل ہیں۔
دوسری جانب اسرائیل کی جوابی بمباری میں شہید ہونے والوں کی تعداد 900 سے تجاوز ہوگئی جس میں 260 بچے بھی شامل ہیں جبکہ 4 ہزار سے زائد زخمی ہیں۔
