لاہور: پاکستان ڈیمو کریٹک موومنٹ (پی ڈی ایم) کے سربراہ مولانا فضل الرحمان نے کہا ہے کہ وزیر اعظم نے وزرا کو اسناد دیں جس کا مطلب کھیل ختم ہو چکا ہے۔
پی ڈی ایم کے سربراہ مولانا فضل الرحمان نے تقریب سے خطاب کرتے ہوئے کہا کہ حکومت کا کچھ پتہ نہیں چلتا کہ کیا کر رہی ہے۔ کل انہوں نے وزیروں کو اسناد دیں اور اسناد تب دی جاتی ہیں جب لگتا ہے کہ کھیل ختم ہو گیا ہے۔
انہوں نے کہا کہ کہتے ہیں دنیا نے ہماری معاشی ترقی کو تسلیم کر لیا ہے تو پھر وزیر خزانہ کو کیوں محروم رکھا گیا ہے۔ اگر معاشی ترقی ہو رہی ہے تو پھر وزیر خزانہ کو سرٹیفکیٹ کیوں نہیں دیا گیا ؟
مولان فضل الرحمان نے کہا کہ کہتے ہیں او آئی سی بہت اہم تھی۔ بہت اچھی تھی تو پھر وزیر خارجہ کو کیوں محروم رکھا گیا ؟ کہتے ہیں ہمارا دفاع بہت مضبوط ہے تو پھر پرویز خٹک کو کیوں نہیں سرٹیفکیٹ دیا گیا ؟
انہوں نے کہا کہ کہتے ہیں ہماری خارجہ پالیسی کامیاب ہے لیکن امریکی صدر فون نہیں اٹھاتا اور چین گئے لیکن چینی قیادت نے ملاقات نہیں کی بلکہ ویڈیو لنک پر بات ہوئی۔ اگر ویڈیو لنک پر ہی ملاقات کرنی تھی تو پھر ادھر سے ہی کر لیتے۔ اتنے خرچے کیوں کیے ؟
انہوں نے کہا کہ مہنگائی عروج پر ہے اور بجلی کی قیمتوں میں آج پھر اضافہ کر دیا گیا ہے۔ ہم نے اپنے آنے والے کھیل کا عندیہ دے دیا ہے۔
