کراچی میں کورونا وائرس کا ایک اور کیس سامنے آ گیا ہے جس کے بعد پاکستان میں اس مرض کا شکار ہونے والوں کی تعداد چھ ہو گئی ہے۔
معاون خصوصی برائے صحت ظفرمرزانے اپنے ٹوئٹ میں نئے کیس کی تصدیق کر دی اور کہا ہے کہ مریض کی حالت مستحکم ہے، اس کا بھرپور خیال رکھا جا رہا ہے۔
236/ 6th case of #coronavirus in Pakistan is confirmed. The patient is in clinically stable condition in Sindh and is being well taken care of.
— Zafar Mirza (@zfrmrza) March 5, 2020
ذرائع کا کہنا ہے کہ کرونا وائرس سے متاثرہ شخص کی عمر 69 سال ہے اور وہ ضلع شرقی کا رہائشی ہے۔
وزیراعلیٰ سندھ نے متاثرہ شخص کے لواحقین کو آئسولیشن وارڈ میں منتقل کرنے کی ہدایت کر دی ہے۔
موجودہ مریض کے سامنے آنے کے بعد سندھ میں رپورٹ ہونے والے کیسز کی تعداد 3 ہو گئی ہے۔
مزید پڑھیں : کورونا وائرس: ہلاکتوں کی تعداد 3000 سے تجاوز کرگئی
چین کے صوبے ووہان سے شروع ہونے والے کورونا وائرس نے اس وقت مزید کئی ملکوں کو اپنی لپیٹ میں لے لیا ہے۔
اس وبا سے دنیا بھر میں ہلاک ہونے والوں کی تعداد 3015 ہوگئی ہے جبکہ 93 ہزار سے زائد اس سے متاثر ہوچکے ہیں۔
موذی مرض سے اٹلی میں مجموعی طور پر ،107 امریکہ میں 11، ایران میں 15، عراق میں ایک جبکہ چین میں مزید 41 افراد جان کی بازی ہار چکے ہیں۔
یہ بھی پڑھیں: کورونا وائرس: حکومت سندھ کو 1213 زائرین کی تلاش
74 ممالک میں پھیلی بیماری کے باعث اٹلی کے تمام تعلیمی ادارے 15 مارچ تک بند کردئیے گئے جبکہ جرمن ایئرلائن لفتھنسا نے150 جہاز گراؤنڈ کر دئیے۔
وائرس کی وجہ سے برلن میں سیاحتی نمائش بھی منسوخ کردی گئی جبکہ لندن کا عالمی کتب میلہ بھی ملتوی کردیا گیا ہے۔
گزشتہ ہفتے وزیر اعلیٰ سندھ سید مراد علی شاہ نے کورونا وائرس کو کنٹرول کرنے کے لیے ٹاسک فورس قائم کی تھی جس میں چیف سیکرٹری، سیکرٹری صحت، کمشنر کراچی اور دیگر افسران شامل ہوں گے۔
