اسلام آباد: بھارتی جارحیت کا ازخود مشاہدہ کرنے کے لئے امریکا، برطانیہ، چین، فرانس اور ترکی کے دفاعی اتاشیوں نے لائن آف کنٹرول (یل او سی) کا دورہ کیا۔
ہم نیوز کے مطابق دورے کے دوران غیر ملکی دفاعی اتاشیوں کی بھارتی جارحیت کے متاثرین سے ملاقاتیں بھی ہوئیں۔
پاک فوج کے شعبہ تعلقات عامہ (آئی ایس پی آر) کے مطابق دفاعی اتاشیوں کو راولاکوٹ سیکٹر کے دورے میں ایل او سی پر بھارتی جارحیت کے متعلق بریفنگ دی گئی۔
اس دوران مختلف ممالک سے تعلق رکھنے والے دفاعی اتاشیوں نے بھارتی فائرنگ سے متاثر ہونے والے عام شہریوں سے ملاقات کر کے آگاہی حاصل کی۔
دوران ملاقات مقامی افراد نے دفاعی اتاشیوں کو ان تکالیف اور مشکلات سے بھی آگاہ کیا جس کا انھیں سامنا کرنا پڑرہا ہے۔
دفاعی اتاشیوں کو اس امر سے بھی آگاہ کیا گیا کہ بھارت کس طرح عام شہریوں کو نشانہ بنارہا ہے۔
عام شہری آبادیوں کی مدد کرنے پر غیر ملکی دفاعی اتاشیوں نے پاک فوج کو زبردست خراج تحسین پیش کیا اور اس کے اقدامات کی تعریف بھی کی۔
گزشتہ چند روز کے دوران بھارتی فوج کی مسلسل ٹارگٹڈ اور بلااشتعال فائرنگ کے نتیجے میں مسافر وین کے ڈرائیور سمیت آٹھ سالہ بچہ اور ایک اٹھارہ سالہ نوجوان شہید ہوئے ہیں۔
