پاکستان مسلم لیگ (ن) کے صدر اور قائد حزب اختلاف شہبازشریف ںے وزیراعظم عمران خان کے دورہ امریکہ پر اپنے بیان میں کہاہے کہ عمران نیازی نے امریکہ میں اپنے خطاب سے اتحاد کا پیغام دینے کا نادر موقع ضائع کردیا ہے۔
شہباز شریف نے کہا کہ عمران نیازی نوازشریف کے خوف میں جیتے ہیں اور اس سے ہٹ کو سوچنے کی صلاحیت کھو بیٹھے ہیں ۔ کاش وہ پاکستان اور اس کو درپیش چیلنجز پر بات کرتے۔
انہوں نے کہا کہ افسوس نوازشریف جیسے محبت وطن اور عوام سے وفا کرنے والے شخص پر کم ظرفانہ الزامات عائد کئے ،عمران نیازی کا ذہنی دیوالیہ پن پوری طرح عیاں ہوچکا ہے۔
سابق وزیراعلی پنجاب نے کہا کہ نوازشریف سے ٹی وی اور ائیر کنڈیشنر چھیننے کی بات کرکے عمران نیازی نے کم ظرفی اور ہلکے پن کا مظاہرہ کیا ۔ ثابت ہوا کہ وہ وزیراعظم کے منصب کے لئے انتہائی ناموزوں شخص ہیں ۔
قائد حزب اختلاف قومی اسمبلی شہباز شریف نے کہا کہ بسوں پر سفر کی شعبدہ بازی کے بجائے بہتر ہوتا کہ پاکستان کے عوام کے لئے اہم معاملات پر ٹھوس پیشرفت کرتے
موصوف نے ایک مرتبہ پھر یوٹرن لے کر اپنے ہی بیانات اوردعووں کا جنازہ نکال دیا ہے۔
شہباز شریف نے کہا کہ ڈاکٹر عافیہ صدیقی کو پاکستان لانے کے دعویدار نے امریکہ میں صحافی کواس پر سوال کرنے سے روک دیا ۔عمران نیازی نے مسئلہ کشمیر کو اقوام متحدہ کی سلامتی کونسل کی قراردادوں کے مطابق حل کرنے کی بات نہیں کی۔
مسلم لیگ ن کے صدر نے سوال اٹھایا کہ کیا عمران نیازی کی حکومت نے کشمیر پر پاکستان کی پالیسی تبدیل کردی ہے؟میڈیا کو کنٹرول کرنے کی بات کرکے عمران نیازی نے امریکہ میں اپنی آمرانہ ذہنیت بے نقاب کردی ہے۔ عمران نیازی نے اپنی حکومت میں میڈیا کے آزاد ہونے کا عالمی جھوٹ بولا۔
شہباز شریف نے کہا کہ قوم اور میڈیا نے دیکھ لیا کہ عمران نیازی صاحب کس پایے کا جھوٹ بولتے ہیں کیونکہ آج ملک میں بدترین سینسرشپ ہے۔ عمران نیازی قوم کوبتائیں کہ انہوں نے امریکہ کے لئے ”ڈومور“ کی کیا پیشکش کی ہے ؟
سابق وزیراعلی پنجاب نے کہا کہ جب نوازشریف نے بھارت اسے اچھے تعلقات کی بات کی تو عمران نیازی نے انہیں ’مودی کایار‘ کہا ،آج عمران نیازی نے نوازشریف کا وژن اپنا لیا ہے نوازشریف ہمسایوں کے ساتھ اچھے تعلقات چاہتے تھے، آج عمران نیازی نے اس پر بھی نوازشریف کے وژن کو اپنالیا ہے۔
انہوں نے کہا کہ عمران نیازی نے دورہ امریکہ سے کچھ حاصل نہیں کیا، صرف یہ ثابت ہوا کہ وہ ملک کے وزیراعظم ہونے کے اہل نہیں ہیں۔ دورہ امریکہ سے ثابت ہوا کہ عمران نیازی محض ایک سلیکٹڈ وزیراعظم ہیں۔
یہ بھی پڑھیے: طالبان سے جلد ملاقات ہوگی، عمران خان
پاکستانی میڈیا قابو سے باہر ہو جاتا ہے، عمران خان
