اسلام آباد: احتساب عدالت نے پاکستان مسلم لیگ (ن) کی نائب صدر مریم نواز کی طلبی کے سمن نیب کو بھجوا دیے ہیں۔ نیب لاہور سمن کی تعمیل کرائے گا۔
ہم نیوز کے مطابق ذمہ دار ذرائع کا اس ضمن میں کہنا ہے کہ سابق وزیراعظم نواز شریف کی صاحبزادی مریم نواز کے لیے جاری کردہ سمن کی تعمیل آج (بروز بدھ) ہی کرائی جائے گی۔
نواز شریف پر گھر کے کھانے کی پابندی: مریم نواز کی بھوک ہڑتال کی دھمکی
ایون فیلڈ ریفرنس (لندن فلیٹس) میں جعلی ٹرسٹ ڈیڈ کے حوالے سے احتساب عدالت کے جج محمد بشیر نے مریم نواز کو نوٹس جاری کرتے ہوئے 19 جولائی کو عدالت میں طلب کیا ہے۔
ہم نیوز کے مطابق جاری کردہ سمن میں ہدایت دی گئی ہے کہ وہ ذاتی حیثیت میں 19 جولائی 2019 کو پیش ہوں۔
مریم نواز شریف نے گزشتہ روز سماجی رابطے کی ویب سائٹ ’ٹوئٹر‘ پر جاری کردہ اپنے پیغام میں عوام الناس سے رائے طلب کی تھی کہ انہیں مشورہ دیا جائے کہ وہ نیب عدالت جائیں یا نہ جائیں؟
آپ سے مشورہ چاہتی ہوں کہ مجھے ایک ثابت شدہ انتقام کے سامنے پیش ہونے کا بائیکاٹ کرنا چاہیئے یا پیش ہو کر NAB عدالت میں کھڑے ہو کر دودھ کا دودھ اور پانی کا پانی کر دینا چاہئے ؟ بلانا ہے تو اپنے رسک پر بلانا! میری باتیں نا سن سکو گے نہ سہ سکو گے! یہ نا ہو کہ پھر سر پیٹتے رہ جاؤ! https://t.co/NurkPBhkKi
— Maryam Nawaz Sharif (@MaryamNSharif) July 9, 2019
مریم نواز کا دعویٰ تھا کہ پریس کانفرنس کے بعد گھبراہٹ میں حکومت نے ان کے خلاف ایک اور مقدمہ قائم کردیا ہے۔
نیب کے ڈپٹی پراسیکیوٹر جنرل نے گزشتہ روز احتساب عدالت میں درخواست جمع کرائی تھی جس میں جعلی ٹرسٹ ڈیڈ پیش کرنے پر مریم نواز کے خلاف کارروائی کرنے کی استدعا کی گئی ہے۔
’تھینک یو ویری مچ‘ مریم نواز نے جج ارشد ملک کا شکریہ ادا کر دیا
میڈیا رپورٹس کے مطابق نیب حکام کا استدلال ہے کہ جعلی ٹرسٹ ڈیڈ پیش کرنے پرمریم نواز، نیب آرڈی ننس کی سیکشن تھری اے کی مجرم قرار پاتی ہیں جس کے تحت پانچ سال کی سزا ہے۔
احتساب عدالت نے گزشتہ سال چھ جولائی کو سابق وزیر اعظم نواز شریف اور ان کی صاحبزادی مریم نواز کو ایون فیلڈ پراپرٹی ریفرنس میں بالترتیب دس سال اور سات سال قید کی سزا سنائی تھی۔
