راولپنڈی میں مون سون بارشوں کے ساتھ ہی ڈینگی نے بھی خطرے کی گھنٹی بجادی، انتظامیہ نے کئی عمارتیں اور دکانیں سیل کردیں۔
اسسٹنٹ کمشنر قندیل فاطمہ کے مطابق راولپنڈی کے علاقے چکلالہ اسکیم تھری میں ڈینگی پھیلنے کا خدشہ ظاہر کیا گیا ہے۔ راولپنڈی کے علاقے چکلالہ اسکیم تھری میں بڑی مقدار میں ڈینگی لاروا برآمد ہونے پر انتظامیہ حرکت میں آگئی۔
اسسٹنٹ کمشنر کا کہنا ہے کہ چکلالہ اسکیم تھری کے علاقے سے متصل نالہ، ڈینگی لاروا سے بھرا پایا گیا ہے۔ نالے میں بڑی تعداد میں ڈینگی مچھر پائے گئے ہیں۔ اس صورتحال کے پیشِ نظر ضلعی انتظامیہ اور محکمہ صحت کی ٹیم نے علاقے کو سیل کردیا ہے۔
نیلم ، سیاحتی مقام وادی سیماری کے جنگلات میں پراسرار بیماری پھیل گئی
اس حوالے سے ڈپٹی کمشنر وقار حسن نے بتایا کہ شہری احتیاطی تدابیر اختیار کریں، یہ ڈینگی مچھر کی افزائش کا موسم ہے۔ اب تک ڈینگی ایس او پیز کی خلاف ورزی پر 200 سے زائد مقدمات درج کیے گئے ہیں۔
خیال رہے کہ اس سے پہلے آزاد جموں و کشمیر میں بھی ڈینگی کے پھیلاؤ کا خطرہ ظاہر کیا گیا تھا۔ طبی ماہرین نے اس حوالے سے خبردار کیا ہے کہ احتیاط نہ برتی گئی تو پچھلے سال کی بہ نسبت رواں سال ڈینگی کیسز میں غیر معمولی اضافہ ہوگا۔
