کرتار پور راہداری پر پاک بھارت مذاکرات کا دوسرا دور کل واہگہ میں ہوگا

کرتار پور راہداری پر پاک بھارت مذاکرات کا دوسرا دور کل واہگہ میں ہوگا،ترجمان دفتر خارجہ ڈاکٹرمحمد فیصل پاکستانی وفد کی قیادت کریں گے۔

پاکستنانی دفتر خارجہ کے ترجمان ڈاکٹر محمد فیصل  مذاکرات سے پہلے اوربعد میں میڈیا سے گفتگو بھی کریں گے۔

بھارتی وفد کی قیادت وزارت امور داخلہ کے جوائنٹ سیکرٹری ایس سی ایل داس کریں گے، بھارتی وفد اٹاری کے راستے کل صبح ہی واہگہ پہنچے گا۔

ذرائع کا کہناہے کہ پاکستانی وفد میں خارجہ، داخلہ، قانون و انصاف، مذہبی امور کے حکام شامل ہوں گے۔ اسی طرح متروکہ وقف املاک، ایف ڈبلیو او اور ایف آئی اے حکام بھی وفد میں شامل ہوں گے۔

ذرائع کے مطابق کرتارپور راہداری کے تناظر میں سڑک، پل اور دیگر سہولیات سے متعلق بات ہو گی، یاتریوں کی تعداد، پیدل یا بذریعہ بس آمدورفت، امیگریشن، سفری دستاویزات کا معاملہ بھی زیر غور ہو گا،گرو پورب اور بیساکھی کے تہواروں پر خصوصی رعایات کے معاملہ پر بھی گفتگو ہو گی۔

اجلاس میں مجوزہ معاہدے کے مسودے کو جلد حتمی شکل دینے پر غور ہو گا،کرتارپور راہداری مذاکرات کے اختتام پر مشترکہ اعلامیہ کے اجراء کی امید ہے۔

یہ بھی پڑھیے: کرتار پور راہداری کی تعمیر تیزی سے جاری