گوجرانوالہ: پاکستان تحریک انصاف کی صوبہ پنجاب میں قائم حکومت نے نائلہ باقر کو ڈپٹی کمشنر گوجرانوالہ مقرر کردیا ہے۔ وزیراعلیٰ عثمان بزدار کی قیادت میں اٹھایا جانے والا یہ فیصلہ اس لحاظ سے منفرد اہمیت کا حامل ہے کہ گوجرانوالہ کی 200 سالہ تاریخ میں ان کا نام پہلی خاتون ڈپٹی کمشنر کی حیثیت سے لکھا جائے گا۔
Honored to have been appointed the first female DC Gujranwala in 200 years. My aim is to serve the people of my city to the best of my abilities. I am available for all your invaluable feedback.
Maximum effort shall be put into addressing all grievances. Long live Pakistan!
— Deputy Commissioner Gujranwala (@DCGRW) February 1, 2019
پاکستان ایڈمنسٹریٹو گروپ سے تعلق رکھنے والی گریڈ 19 کی آفیسر نائلہ باقر نے سماجی رابطوں کی ویب سائٹ ٹوئٹر پر جاری کردہ اپنے پیغام میں کہا ہے کہ ’یہ میرے لیے اعزاز کی بات ہے کہ گوجرانوالہ کی 200 سالہ تاریخ میں پہلی خاتون ڈپٹی کمشنرہوں۔‘
انہوں نے ٹوئٹر پر لکھا ہے کہ ’میرا مقصد یہ ہے کہ اپنے شہر کے لوگوں کی اپنی بہترین صلاحیتیں بروئے کار لاتے ہوئے بہتر خدمت کرسکوں۔‘
انہوں نے سماجی رابطے کی ویب سائٹ پر لکھا ہے کہ ’اس ضمن میں ملنے والی قیمتی آراء پر شکرگزار رہوں گی۔‘
نائلہ باقر نے یہ یقین دہانی بھی کرائی ہے کہ ’عوام الناس کے مسائل کے حل کے لیے تمام ممکنہ کوششیں بروئے کار لاؤں گی۔‘
گریڈ 19 کی آفیسر نائلہ باقر نے اپنے ٹوئٹ کا اختتام ’پاکستان زندہ باد‘ کے نعرے سے کیا ہے۔
