اسلام اباد: افعانستان میں برسرپیکار انتہا پسند گروہ داعش کے سربراہ ابو سعید اورکزئی کو امریکی ڈرون حملے میں نشانہ بنایا گیا ہے۔
سعد ارہابی کے نام سے پہچانے جانے والے داعش کے سربراہ ابو سعید اورکزئی کو اس وقت نشانہ بنایا گیا جب افغانستان کے مشرقی صوبے ننگر ہار میں موجود داعش کی خفیہ پناہ گاہ پر حملہ کیا گیا۔
ننگرہار کے گورنر کے ترجمان نے داعش کے سربراہ کی ڈرون حملے میں مارے جانے کی تصدیق کی ہے۔ انہوں نے کہا کہ حملے میں ابو سعید اورکزئی اپنے 10 ساتھیوں سمیت ہلاک ہوا ہے۔
عالمی میڈیا نے صوبائی حکومت کے ترجمان عطااللہ کھوگیانی کے حوالے سے بتایا کہ اس ڈرون حملے کے نتیجے میں داعش کے دو اڈے بھی تباہ کیے گئے ہیں۔
افغان انٹیلی جنس اہلکاروں کے مطابق دہشت گردی کے خلاف اس آپریشن میں بین الاقوامی فوجوں کا تعاون حاصل تھا۔
امریکی فوج کے ترجمان لیفٹیننٹ کرنل مارٹن اوڈونل نے ایک امریکی نشریاتی ادارے سے بات کرتے ہوئے تصدیق کی کہ امریکی فوجوں نے ہفتے کے روز ایک دہشت گرد تنظیم کو ہدف بنایا ہے۔
داعش نے افغانستان میں اپنی سرگرمیاں 2015 میں شروع کی تھیں اور ارہابی اُس کے بعد سے اب تک مارے جانے والا اس تنظیم کا چوتھا لیڈر ہے۔